Այսօր ԱԺ նախագահ Գալուստ Սահակյանը նիստի սկզբում գնահատական տվեց երեկ ղարաբաղա- ադրբեջանական սահմանի արեւելյան հատվածի օդային տարածքում ադրբեջանական զինված ուժերի կողմից խոցած Լեռնային Ղարաբաղի ռազմաօդային ուժերի Մի-24 ուղղաթիռի միջադեպի մասին:
Նա ասաց. «Սա պաշտոնական Բաքվի հերթական սադրիչ գործողությունն է՝ ուղղված տարածաշրջանի փխրուն խաղաղությանն ու անվտանգությանը: Այս տարվա օգոստոսին տեղի ունեցած բացահայտ սադրիչ եւ ավանտյուրիստական ոտնձգություններից հետո, ԵԱՀԿ Մինսկի խմբի գործադրած ջանքերը եւ հորդորները փաստորեն հերթական անգամ ընդգծված ցինիզմով անտեսվում է Ադրբեջանի իշխանությունների կողմից: Սա բանակցային խաղաղ գործընթացը տապալելու եւս մեկ քայլ է, որով ոտնահարվում են խաղաղ կարգավորման վստահության ամրապնդման եւ հրադադարի ռեժիմի պահպանման շուրջ բոլոր պայմանավորվածությունները: Իրավիճակի սրման եւ ապակայունացման փորձերի ողջ պատասխանատվությունը կրում են Բաքվի իշխանությունները: Ուստի հերթական անգամ կոչ եմ անում ԵԱՀԿ Մինսկի խմբի նախագահ երկրներին դատապարտել եւ առավել հստակ ու հասցեական ներգործություն ունենալ Ադրբեջանի վրա՝ խաղաղ կարգավորման գործընթացի ձախողման փորձերը կանխելու նպատակով»:
Գալուստ Սահակյանն ասաց, որ ուսումնավարժական գործընթացի ընթացքում իրենց զինվորական պարտքը կատարելիս զոհվել է ԼՂՀ պաշտպանական բանակի 3 զինծառայող՝ հրամանատար-մայոր Սերգեյ Սահակյանը, ավագ լեյտենանտ Սարգիս Նազարյանը եւ լեյտենանտ Ազատ Սահակյանը:
Գալուստ Սահակյանն առաջարկեց 1 րոպե լռությամբ հարգել զոհված զինծառայողների հիշատակը:
Կարդացեք նաև
Հռիփսիմե ՋԵԲԵՋՅԱՆ
