Գյումրու բնակիչները դեռ ուշքի չեն գալիս նախորդ օրը Հոռոմի խաչմերուկում տեղի ունեցած ողբերգությունից: Ամենուր պատմություններ են շրջանառվում վթարի հանգամանքների ու զոհերի մասին: Հիշողություններ են պատմում հարազատները, ծանոթները, հարևանները:
Սակայն ամենադաժանը Հոռոմի խաչմերուկում գտնվող գազալցակայանի աշխատակիցների հիշողություններ են: Վերջիններս օգնության են հասել այրվող գազելի ուղևորներին: Մեզ հետ զրույցում ողջ մնացածներից շատերը չէին հիշում, թե իրենց հետ ինչ է կատարվել: Սակայն, ըստ շրջանառվող պատմության, տղամարդկանցից մեկը գազալցակայանի աշխատակիցներին աղաչել է փրկել իրեն, սակայն նրա ոտքերը շրջված ու այրվող գազելից դուրս են ընկել, մարմնի վերևի հատվածը մնացել է ներսում: Հսկա չարչարանքներից հետո հնարավոր չի եղել նրան տեղաշարժել, վերջինս կյանքը փրկել չի հաջողվել ու նա մոխրացել է՝ անճանաչելի դառնալով: Մեր ձեռքի տակ կա այդ ուղևորի լուսանկարը, բնականաբար չենք հրապարակում՝ գիտակցելով, որ էթիկորեն խիստ անթույլատրելի է նման դաժան տեսարաններով ընթերցողներին սթրեսային վիճակի մեջ գցելը:
Այս պահին Շիրակի մարզպետ Ֆելքս Ցոլակյանը հերթով այցելում է զոհվածների տները՝ փոխանցելու նախագահի հրամանով ամեն մեկին հատկացված 1 միլիոն դրամը: Նրանց մեծ մասի հուղարկավորությունը վաղն է:
Նշենք, որ Գյումրու քաղաքապետարանը ևս դրամական աջակցություն է ցուցաբերում զոհվածների հարազատներին ու հիվանդանոցում գտնվող տուժածներին: Իսկ վաղը Գյումրու Սբ. Աստվածածին Յոթ Վերք եկեղեցում, երեկոյան ժամերգությունից անմիջապես հետո` 17:30-ին, տեղի է ունենալու ավտովթարի զոհերի հոգեհանգստյան կարգ:
Կարդացեք նաև
Լուսանկարը՝ Հայկ Բարեսղյանի
Նունե ԱՐԵՎՇԱՏՅԱՆ
