«Ափսոս հայերեն խոսել չեմ կարող»,-ՀՀ-ում Ֆրանսիայի նորանշանակ դեսպան, արևելյան լեզուների մասնագետ Ժան-Ֆրանսուա Շարպանտիեն հայերեն պատասխանեց հարցին` արդյոք հայերենին տիրապետո՞ւմ է ու դիմելով լրագրողներին` ասաց. «Հույս ունեմ հայերենի ուսումնառության ճանապարհին առաջընթաց գրանցել ձեր օգնությամբ»:
Ինչպես արդեն տեղեկացրել ենք, պարոն դեսպանը երեկ է իր հավատարմագրերը հանձնել ՀՀ նախագահ Սերժ Սարգսյանին: ՀՀ-ում Ֆրանսիայի դեսպանատանը հրավիրված մամուլի ասուլիսին լրագրողները հետաքրքրվեցին` ի՞նչ փուլում են Հայոց ցեղասպանության ժխտումը քրեականացնող օրինագծի վերաբերյալ աշխատանքները: Ժան-Ֆրանսուա Շարպանտիեն պատասխանեց. «Սա առաջին հերթին Ֆրանսիայի հանրապետության գործադիր իշխանության, մասնավորապես արդարադատության նախարարության աշխատանքն է: Նրանք աշխատանքներ են տանում նոր օրինագծի մշակման ուղղությամբ, որոնք պետք է հաշվի առնեն սահմանադրական խորհրդի արված դիտողությունները: Ինչ վերաբերում է ժամկետներին, ապա այսօրվա դրությամբ օրակարգային ստույգ ժամկետ չեմ կարող ասել, թե այդ օրինագիծը, երբ մուտք կգործի օրենսդիր իշխանություն»:
Տաթև ՀԱՐՈՒԹՅՈՒՆՅԱՆ
