Երեկվանից ինտենսիվ շրջանառվում է «իշխանության նահանջի» վարկածը: Ինքնին զարմանալի է, թե որտեղի՞ց կամ ինչի՞ց նման հետեւության կամ ենթադրության հանգեցին եռյակամերձ քարոզչական շրջանակները: Արդյոք կա՞ ընթացիկ որեւէ լուրջ դրսեւորում, որի պայմաններում իշխանությունն էլ տեղի տար: Ամենեւի՛ն:
Եռյակը, ինչպես հայտնի է, մի 20 օր առաջ հայտարարել է «ակտիվ գործողությունների» մասին, բայց հոկտեմբերի 24-ի հանրահավաքից այս կողմ առանձնապես ակտիվ գոյության նշաններ ցույց չի տվել: Կարելի է հիշատակել թերեւս միայն ՀԱԿ-ԲՀԿ «փոխհրաձգությունը», բայց դա էլ ավելի շուտ եռյակի դեմ է խոսում, այլ ոչ թե օգտին:
Հետեւաբար եռյակի պասիվության, ներքին խնդիրներն ի ցույց դնելու խորապատկերում իշխանությունն ի՞նչ ուներ «նահանջելու»՝ բացարձակապես անհասկանալի է: Նույնիսկ հակառակը, իշխանությունը, տվյալ պարագայում՝ նախագահը, խաղին վերադարձնում է ինտրիգը:
Այլ կերպ ասած, 12 կետերի մասին հիշեցումը եռյակի համար, նախ, քննարկման թեմա է ապահովում, ըստ որում՝ այնպիսին, որը կարող է հանրության ուշադրությունը շեղել եռյակի ներքին խնդիրներից: Եվ հետո, եռյակը, գոնե հակադարձելու առումով, ակտիվանալու առիթ է ստանում: Այսինքն՝ իշխանությունը դեռ մի բան էլ խթանում է արդեն մի տեսակ նիրհող եռյակի ակտիվացմանը:
Կարդացեք նաև
Հասկանալի է, իհարկե, որ քարոզիչները շտապել են շրջանառել «նահանջի» ու «ռեժիմը վախեցած է»-ի կարգի կաղապարները: Բայց դա թերեւս ամենասխալ բանն է, որ կարելի էր անել: Իշխանությունը այս ընթացքում, հակառակը, իր քայլերով միշտ ցույց է տվել, որ դրանց չարժե միագիծ ու մակերեսորեն մոտենալ: Մինչդեռ ընդդիմախոսները շարունակում են տրորել նույն փոցխը՝ տրվելով այսրոպեական քարոզչական կարճաժամկետ ազդեցություն ունենալու գայթակղությանը:
… Ավելի քննախնդիր դիտարկման դեպքում պետք է որ նկատելի լիներ. իշխանությունն առաջարկում է ճատրակել, այսինքն՝ շախմատ «խաղալ»՝ միաժամանակ մնալով կառուցողական դաշտում եւ նույնն առաջարկելով ընդդիմախոսներին: Վերջիններիս համար միգուցե նախընտրելի է դա ներկայացնել որպես իշխանության թուլության դրսեւորում կամ էլի նման մի բան: Առավել եւս, որ մի երկու-երեք շաբաթ առաջ, իրենց «ձիու վրա» զգալով, եռյակի ներկայացուցիչները կապիտուլյացիայի ախորժակ էին «ցուցադրում»: Հնարավոր է, որ իներցիայով նրանք էլի կարող են մերժողական մոտեցում դրսեւորել:
Սակայն հենց եռյակի ներսում եղած տարաձայնությունները հաղթահարելու կամ գոնե մեղմելու նկատառմամբ եռյակը գուցե այնքան շրջահայաց գտնվի, որ որոշի «օդում չթողնել» պարզած ձեռքը:
Ա. ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
