Բազմիցս եմ ահազանգել ՀՀ մարզպետների եւ մարզպետարանների կրթության վարչությունների քաղծառայող պետերի անօրինական գործունեության մասին:
Կոտայքի մարզպետ պարոն Հարությունյանի ուշադրությունն եմ հրավիրում մարզպետարանի աշխատակազմի կրթության վարչության պետ Հ. Կոստանյանի գործունեության վրա, ով քաղծառայողի կարգավիճակ ստանալու համար ՀՀ օրենքների իմացության վերաբերյալ անպայման քննություն է հանձնել, բայց չգիտի, որ «Հանրակրթության մասին» ՀՀ օրենքի 25-րդ հոդվածի համաձայն՝ պետական ուսումնական հաստատության մեկ դրույքով պաշտոնավարող վարչական աշխատողը համատեղության կարգով կարող է ունենալ շաբաթական մինչեւ 8 դասաժամ ուսումնական ծանրաբեռնվածություն:
Կոտայքի մարզի Ֆանտան գյուղի դպրոցի տնօրեն, մաթեմատիկայի ուսուցիչ Նարինե Աբրահամյանը տարիֆիկացիայով շաբաթական 8 դասաժամ է ունեցել, որի թույլտվությունը պարոն Կոստանյանը վերապահել է իրեն: Տնօրենը 27.10.2014թ. հ.117/1 թվակիր նամակով Կոստանյանից խնդրել է այդ թույլտվությունը, ով անթվակիր, փաստորեն ոչ պաշտոնական նամակով պատասխանել է. «Քննարկման արդյունքում մարզպետարանն անհրաժեշտ է համարում սահմանված կարգով հայտարարել «Մաթեմատիկա» առարկայի ուսուցչի թափուր տեղի համար մրցույթ»:
Հետաքրքիր է, թե ո՞ւմ հետ է մարզպետարանում քննարկել օրենքով ամրագրված նորմի մասին: Ստացվում է, որ Կոտայքի մարզպետարանում օրենքներին չի տիրապետում ոչ միայն պարոն Կոստանյանը: Մարզպետարանը կոպտորեն միջամտում է նաեւ դպրոցներում կադրերի ընտրության գործընթացին: Հանձնարարում են իրենց հետ համաձայնեցնել ցանկացած կադրի նշանակում, որը պարզապես խանգարում է տնօրենին աշխատել: Այնինչ վերոնշյալ օրենքի 12-րդ հոդվածի 16-րդ կետի համաձայն՝ տնօրենը պատասխանատու է պետական կրթական գործընթացի կազմակերպման եւ կադրերի ընտրության համար:
Կարդացեք նաև
Ներկայացնում եմ անթվակիր այն նամակի պատճենը, որի կատարողը Հ. Կոստանյանն է, եւ հուսով եմ, որ մարզպետն առնվազն կարգի կհրավիրի նրան:
ԱՆԱՀԻՏ ԲԱԽՇՅԱՆ
կրթության փորձագետ
«Առավոտ» օրաթերթ
11.11.2014
