Այս սնկապուրը մյուսներից տարբերվում է նրանով, որ չունի այլ համային հավելումներ, մեջը չկան, ասենք՝ գազար, կարտոֆիլ, բրինձ եւ այլն, համը միանգամայն սնկային է: Բացի այդ՝ հեշտ է պատրաստվում եւ շատ համեղ է:
Անհրաժեշտ մթերքները
Սունկ- 1 կգ (կարելի է վերցնել միայն շամպինյոն կամ միայն պորտաբելո, կարելի է վերցնել այդ երկուսից՝ խառը, բայց կախասունկ (ծառի սունկ) խորհուրդ չեմ տա)
Կարդացեք նաև
սոխ- 1 գլուխ սպիտակ (եթե ունեք նաեւ պրաս՝ բուլղարական սոխ, ապա ավելացրեք դրա սպիտակ մասը եւս, շատ համեղ կլինի)
ալյուր-3 ճաշի գդալ
բուսական յուղ- 4 ճաշի գդալ
կարագ- 1 ճաշի գդալ
համեմունքներ- ըստ ճաշակի, օրինակ՝ սեւ պղպեղ, շաֆրան, համեմի սերմ եւ այլն
աղ-ըստ ճաշակի
կաթնասեր- ըստ ճաշակի
Պատրաստման եղանակը
Սունկը մաքրել, լավ լվանալ, թողնել ջրքամվի: Սոխը մանր կտրատել:
Կտրատել նաեւ սունկը, մի քանի հատիկ թողնել ձեւավորման համար: Թավայի մեջ տաքացնել բուսական յուղն ու կարագը իրար հետ, ավելացնել սոխը: Երբ սոխը մի քիչ փափկի եւ թափանցիկ դառնա, ավելացնել կտրատած սունկը, թողնել սունկն էլ տապակվի՝ խառնելով: (Ի դեպ, եթե պատահաբար չորացրած սունկ ունեք, անպայման մի քիչ ավելացրեք, արտակարգ համ է տալիս):
Երբ սունկը արդեն լավ տապակվել է, ավելացրեք համեմունքները եւ ալյուրը, անընդհատ խառնեք, որ ալյուրը բովվի: Քիչ-քիչ ավելացնել եռացրած ջուր՝ կրկին անընդհատ խառնելով, որ ալյուրը լուծվի: Ավելացնել նաեւ աղը եւ թողնել 10-15 րոպե եփվի: Եփվելուց հետո ապուրը հարել բլենդերով: Եթե ձեռքի բլենդերով եք հարելու՝ կարող եք անմիջապես կաթսայի մեջ անել, եթե բաժակով բլենդերով՝ թողեք մի փոքր սառչի, նոր հարեք: Նկատեմ, որ բլենդերով հարելու պահը կարող եք նաեւ բաց թողնել՝ ապուրի համի վրա դա որեւէ ազդեցություն չի ունենա՝ միայն տեսքը տարբեր կլինի:
Հետ լցրեք կաթսայի մեջ, դրեք կրակին, ապուրի մեջ ավելացրեք բարակ տաշեղներով կտրատած այն մի քանի սունկը, որ պահել էինք ձեւավորման համար:Թողեք 5-7 րոպե էլ մնա կրակին եւ անջատեք:
Լցրեք ափսեի մեջ, վրան մի գդալ կաթնասեր դրեք (պարտադիր չէ), կտրատած կանաչի (համեմ կամ սամիթ) ավելացրեք եւ մատուցեք հացի կամ չորահացի հետ:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ» օրաթերթ
08.11.2014
