«ՄԱՏԵՔ» ՍՊ ընկերության տնօրեն Աշոտ Մատինյանն առանձնապես մեծ հույսեր չէր կապում ոստիկանության բաժին իրեն կանչելու, գործին ընթացք տալու համար, քանի որ մի անգամ նա «անցել» է այդ ճանապարհով:
Aravot.am-ի լուրը հաստատեց Աշոտ Մատինյանը, հայտնեց, որ իրեն կանչել են փաստաբան Լիանա Բալյանի դիմումից հետո ոստիկանություն:
Փաստաբանն օրեր առաջ դիմել էր ՀՀ ոստիկանապետ, գեներալ-լեյտենանտ Վ.Գասպարյանին, ՀՀ գլխավոր դատախազ Գ.Կոստանյանին, ՀՀ Ոստիկանության Երևան քաղաքի վարչության Կենտրոնականի բաժնի պետ, ոստիկանության փոխգնդապետ Ա. Պողոսյանին, Կենտրոն և Նորք-Մարաշ վարչական շրջանների դատախազի պաշտոնակատար, արդարադատության առաջին դասի խորհրդական Գ. Հ. Հարությունյանին, պահանջելով քրեական գործ հարուցել 60-ամյա Լյուսյա Հակոբյանի նկատմամբ, իր հասցեին արատավորող տեղեկություններ հրապարակելու, սպառնալիքով գումար պահանջելու համար: Փաստաբանը նաեւ հայտնել էր, որ Լ.Հակոբյանը լինելով ՀՀ վճռաբեկ դատարանի նախագահի հոր՝ Յուրա Մկրտումյանի մտերմուհին, պահանջել է իրենից նախկինում վարձակալած Երևանի Սայաթ-Նովա 23 շենքի թիվ 26 տարածքի վարձակալության գումարները: Այն դեպքում, երբ նա պարտքուպահանջ չունի, եւ գումարները մուծած լինելու մասին փաստաթղթեր ունի:
Իրավապահներին ուղղած իր դիմումում փաստաբան Լիանա Բալյանը հայտնել էր, որ ՀՀ Ոստիկանության Երևան քաղաքի վարչության Կենտրոնականի բաժնում է գտնվում իր դիմումը` Լյուսյա Հակոբյանի դեմ նրա կողմից շորթմամբ գումար հափշտակելու վերաբերյալ, որով նախապատրաստվում են նյութեր: «Լ. Հակոբյանի կողմից շորթմամբ գումարներ են հափշտակվել քաղաքացիներ Աշոտ Մատինյանից, Ալբերտ Մատինյանից, Վիկտոր Բաղդագուլյանից, Արևիկ Խաչատրյանից և Վարդանանց 115 հասցեում գտնվող խանութի տնօրեն Գևորգից»,-գրել էր փաստաբանը:
Աշոտ Մատինյանն aravot.am-ին ասաց, որ ներկայացրել էր իր եւ հոր, մասնագիտությամբ բժիշկ Ալբերտ Մատինյանին առնչվող դատական վեճի մասին առկա փաստաթղթերը:
Կարդացեք նաև
Ըստ այդ փաստաթղթերի, Լ.Հակոբյանը հայցով տարիներ առաջ դիմել է դատարան, որպեսզի սեփականության իրավունքով ձեռք բերված տարածքի՝ Սայաթ-Նովա 23 շենքի թիվ 26 հասցեի առքուվաճառքի պայմանագիրը «հեչ» արվի, սեփականությունը գրանցվի իր անունով, այլ ոչ Ալբերտ Մատինյանի:
Ի դեպ, վեց տարի առաջ 780 000 դրամի չափով արգելանք էր դրվել Ալբերտ Մատինյանի նշյալ տարածքի վրա:
Ոստիկանությունում նորից խոսք էր գնացել այն մասին, որ իրական սեփականատիրոջն առանց տեղյակ պահելու, նշյալ տարածքը վարձակալությամբ Լ.Հակոբյանը տվել է տարբեր անձանց, այդ թվում նաեւ փաստաբանին: Դատական գործընթացների ժամանակ, արձանագրվել էր, որ վարձակալությամբ տրվելիք նկուղային տարածքի բանալիները մշտապես գտնվել են Լ. Հակոբյանի մոտ:
Ռուզան ՄԻՆԱՍՅԱՆ
