«…Լինելով ծաղրածուների արքան՝ նա երբեք չի եղել արքաների ծաղրածուն: Եվ մեկ էլ նա ուներ գերբնական շնորհ: Նրա ներկայությամբ բոլորն իրենց հանճար էին զգում: Երեւի այդ պատճառով էր, որ նրան ճշմարտապես սիրողը չէր վիրավորվում, երբ որեւէ մեկը չէր դիմանում իր դիմակահանդեսային «տեմպին», չէր դիմանում իր խելքի, հումորի, բարության ճնշմանը: Նրա բարությունն էլ սահման չուներ»,-Գարրի Կունցեւի «Կար-չկար՝ մի Փարաջանով» գրքից այս խոսքերը այսօր տեղ էին գտել «Դալան» ցուցասրահում հայազգի կինոռեժիսոր Սերգեյ Փարաջանովի լուսանկարների ցուցահանդեսի ժամանակ:
Սերգեյ Փարաջանովի լուսանկարների ցուցահանդեսը, ինչպես Aravot.am-ի հետ զրույցում ներկայացրեց ցուցահանդեսի կազմակերպիչ Art PR ընկերության տնօրեն Գայանե Դավթյանը, նվիրված է կինոռեժիսորի 90 ամյակին:
Գայանե Դավթյանը պատմեց, որ ցուցահանդեսի լուսանկարները պատկանում են ուկրաինացի կինոօպերատոր եւ լուսանկարիչ Յուրի Գարմաշին, որը Սերգեյ Փարաջանովին լուսանկարել է 1970-ական թվականներին:
Ցուցահանդեսի նկարները նաեւ կվաճառվեն, իսկ վաճառքից ստացված հասույթը տրամադրվելու է «Աբովյան» քրեակատարողական հիմնարկում գտվող անչափահասներին, որոնք ստեղծագործում եւ նկարում են. «Փարաջանովը ինքը եղել է կալանավայրում, չի ունեցել ստեղծագործելու հնարավորություն, այդ իսկ պատճառով ցուցահանդեսի նկարների վաճառքը խորհրդանշական է: Փարաջանովը ստեղծել է իր կոլաժները, երբ ոչինչ չի ունեցել կալանավայրում: Եվ գուցե հենց այս ցուցահանդեսից հետո էլ կալանավայրում գտնվող երիտասարդների մոտ էլ բացահայտվեն իրենց տաղանդները»,-նշեց մեր զրուցակիցը:
Կարդացեք նաև
Էլյա ՀՈՎՀԱՆՆԻՍՅԱՆ
