Նոյեմբերի 2-ին Ֆրեզնոյում տեղի ունեցավ Հայոց ցեղասպանության զոհերի հիշատակին նվիրված հուշարձանի հիմնարկեքի արարողությունը՝ համայնքի ներկայացուցիչների, ամերիկացի պաշտոնյաների մասնակցությամբ:
Հուշարձանը կկառուցվի Ֆրեզնոյում ՀՀ պատվավոր հյուպատոս Պերճ Աբգարյանի, Լոս Անջելեսում ՀՀ գլխավոր հյուպատոսության և համայնքի համատեղ ջանքերով և կտեղակայվի Ֆրեզնոյում Կալիֆորնիայի համալսարանի տարածքում: Նախագծի աջակիցներից է Կալիֆորնիայի համալսարանի նախագահ Ջոզեֆ Կաստրոն:
Բացման խոսքով հանդես եկավ Ֆրեզնոյում ՀՀ պատվավոր հյուպատոս Պերճ Աբգարյանը, ով նշեց, որ Հայոց ցեղասպանության զոհերի հիշատակին նվիրված հուշարձանը համայնքի տուրքն է անմեղ զոհերի հիշատակին, նաև՝ գալիք սերունդներին իրենց պատմությանը, արմատներին ու հայրենիքին կապող խորհրդանիշ:
ԱՄՆ կոնգրեսական Ջիմ Կոստան հիմնարկեքի արարողության ժամանակ նշեց, որ հուշարձանի կառուցումը կարևոր է ոչ միայն Հայոց ցեղասպանության զոհերի հիշատակը հավերժացնելու, այլև սերունդներին պատմության սև էջի մասին հիշեցնելու և դրա կրկնությունը ապագայում կանխելու համար:
ԱԳՆ
