Ինչպես արդեն տեղեկացրել էինք Վայոց Ձորի մարզպետ նշանակվեց Վայքի քաղաքապետ Հանրապետական կուսակցության անդամ Հարություն Սարգսյանը: Այսօր կառավարության նիստից հետո լրագրողները պարոն Սարգսյանից հետաքրքրվեցին` կուսակցության շահերը պաշտպանելու համա՞ր են իրեն նշանակել, քանի որ վարչապետն այսօր նիստին ասաց, որ պետք է արդարացնի կառավարության հույսերը: «Ինչու չէ՞, նաեւ կուսակցության շահերը, բայց առաջին հերթին` ժողովրդի հետ աշխատելու` Վայոց Ձորի ժողովրդի, Վայոց Ձորից եմ, վայքեցի եմ, ապրել եմ այնտեղ, ապրելու եմ, եւ ժողովրդի հետ հարաբերվելու եմ այնպես, ինչպես հարաբերվել եմ քաղաքապետ եղած ժամանակ»,-ասաց նորանշանակ մարզպետը:
Հարություն Սարգսյանի խոսքերով` «Ես ունեմ աշխատանքային փորձ. (աշխատել է նաեւ փոխմարզպետ Ն. Բ.), կենսագրություն` տարբեր պոստեր զբաղեցնելու, տիրապետում եմ մարզի ընդհանուր բոլոր խնդիրներին»:
Հարցին` ի՞նչ է անելու, որ նախկին մարզպետը չէր արել, Սարգսյանն ասաց, որ նախկին մարզպետը վատ չի աշխատել, կատարելու է մարզպետի իրավունքներն ու պարտականությունները, ինչ-որ առանձնահատուկ խնդիր դրված չէ:
Ինչո՞վ է պայմանավորում մարզպետի փոփոխությունները, այս հարցին էլ՝ ասաց, որ տեղյակ չէ:
Հիշեցնենք, որ երեկ մեզ հետ զրույցում պարոն Սարգսյանը վստահեցրել էր, որ մարզպետարանի աշխատակազմում կադրային ջարդ չի անելու, քանի որ բոլորը պրոֆեսիոնալներ են:
Նելլի ԲԱԲԱՅԱՆ
