Ամռանը գյուղի հողերը լիարժեք չեն ոռոգվում:
Տավուշի մարզի Աղավնավանք գյուղը գտնվում է Դիլիջանի տարածաշրջանից դեպի Ճամբարակ տանող ավտոճանապարհի հարեւանությամբ: Նախկինում ադրբեջանաբնակ գյուղն այժմ ունի շուրջ 300 բնակիչ, որոնք Ադրբեջանի Վարդաշենի, Շամխորի եւ այլ շրջաններից բռնագաղթածներ են:
Մի քանի տարի առաջ երեւանցիները գեղեցիկ բնություն ունեցող Աղավնավանքում իրենց համար որպես ամառանոցներ տներ են գնել, դրանք վերանորոգել: Աղավնավանք համայնքի ղեկավար Վարդան Գրիգորյանը հայտնեց , որ երեւանցիներն այլեւս իրենց գյուղում տներ չեն գնում:
Նախկինում Աղավնավանքի դպրոցում օտար լեզու եւ հասարակագիտություն դասավանդած Վ. Գրիգորյանը այս տարվա մարտի 9-ին ընտրվել է համայնքի ղեկավար, ապրիլի 26-ին՝ անցել իր պարտականությունների կատարմանը:
Կարդացեք նաև
Նրան հարցրի Աղավնավանքում, Գետիկ գետի վրա կառուցված փոքր ՀԷԿ-ի մասին: Գյուղապետն ասաց, որ երբ ինքը սկսել է պաշտոնավարել, փոքր հիդրոէլեկտրակայանն արդեն կառուցված էր: Այն կառուցել է «Էյ-Էն-ԴԻ-Ջի սթայլ» ընկերությունը: ՀԷԿ-ի աշխատակիցների մեջ միայն մեկ աղավնավանքցի կա: ՀԷԿ-ը կառուցած, այն շահագործող ընկերությունը Աղավնավանքի ՀԷԿ-ի աշխատանքն ապահովելու համար համայնքապետարանի հետ համայնքային նշանակության հողերի վարձակալության պայմանագիր ունի,որի համաձայն տարեկան 132 հազար դրամ վարձակալության գումար է մուծում համայնքի բյուջե: Աղավնավանքի տարեկան բյուջեն փոքր է՝ 4 միլիոն 900 հազար դրամ, որից 3,5 միլիոնը կազմում է պետական լրավճարը:
Գյուղապետը չգիտի, թե որքա՞ն է կազմում փոքր ՀԷԿ-ի հզորությունը, այն որքա՞ն էլեկտրաէներգիա է արտադրում: Վարդան Գրիգորյանն ասաց, որ նախկինում փոքր ՀԷԿ-ը ղեկավարում էր դրա բաժնետերերից Նիկոլայ Գրիգորյանը: Համայնքի ղեկավարը չգիտի , թե ո՞վ է այդ ձեռնարկության ներկայիս տնօրենը: Վ. Գրիգորյանը հայտնեց, որ ՀԷԿ-ի խողովակաշարն անցկացնելիս քանդել էին համայնքի կենտրոնական ճանապարհը, ինքը այդ կապակցությամբ խնդրել է Նիկոլայ Գրիգորյանին, եւ ճանապարհը հարթեցվել է:
Գյուղապետն ասաց, որ ՀԷԿ-ը Գետիկից ջուր վերցնելու հետեւանքով այս տարվա ամռանը գետում ջուրը խիստ պակասել էր: Դա խնդիր առաջացրեց գյուղի հողերը գետի ջրով ոռոգելու համար: Աղավնավանքի նախկին գյուղապետ Վարդուշ Ներսիսյանը անցյալ տարի մեզ ասել էր, որ դիմելու է փոքր ՀԷԿ-ի սեփականատերերին, որպեսզի ՀԷԿ-ի արտադրած էլեկտրաէներգիայից ձրի կամ կես գնով մատակարարվի 100 տուն ունեցող Աղավնավանքին: Վարդան Գրիգորյանն ասաց, որ փոքր ՀԷԿ-ից գյուղին ձրի կամ զեղչով հոսանք չի մատակարարվում:
Ոսկան ՍԱՐԳՍՅԱՆ
