Ազատության հրապարակում մեկնարկել է Անոնիմուսների երթը:
Անցած տարի այս օրը Շանթ Հարությունյանը եւ նրա ընկերները այդպիսի դիմակներով ակցիա էին անցկացնում, երբ ոստիկանների հետ բախում տեղի ունեցավ, եւ նրանց ձերբակալեցին: Օրեր առաջ Շանթ Հարությունյանը եւ նրա ընկերները դատապարտվեցին մինչեւ յոթ տարվա ազատազրկման, այդ թվում՝ Շանթի որդին՝ Շահեն Հարությունյանը՝ 4 տարի պայմանական ազատազրկման:
Այդ դեպքերի հետ կապված այսօր կայացած ակցիայի ժամանակ մի խումբ դիմակավորված անձինք հրապարակ էին եկել Վոլոդյա Ավետիսյանի, Շանթ եւ Շահեն Հարությունյանների եւ մյուսների դիմանկարներով:
Ակցիայի նպատակն է ապացուցել, որ Հայաստանում կան քաղբանտարկյալներ, որոնց պետք է ազատ արձակել: Մինչ երթի մեկնարկը ակցիայի մասնակիցներից յոթ-ութ հոգու ոստիկանները բերման են ենթարկել: Բերման ենթարկվածներն են Տիգրան Փարսիլյանը, Արտակ Գևորգյանը, Մաքս Սարգսյանը, Հերբերտ Գևորգյանը, Սուրեն Սահակյանը, Դվին Իսանյանսը, Արա Պետրոսյանը եւ Վահագն Մինասյանը:
Կարդացեք նաև
Լրագրողների հետ զրույցում փոխոստիկանապետ Վալերի Օսիպյանը պարզաբանեց, որ բերման ենթարկվածները խանգարել են այլոց տեղաշարժման իրավունքը, բայց թե հատկապես ում եւ որ տեղաշարժման մասին է խոսքը՝ չասաց, հորդորեց դիմել ոստիկանության լրատվական բաժին:
Երթի մասնակցիները այս պահին «Ազատ, անկախ Հայաստան» վանկարկելով Մաշտոցի պողոտայով հասան Հանրապետության հրապարակ, որտեղից էլ նախատեսվում է կրկին հետ վերադառնալ Ազատության հրապարակ:
Անոնիմուսների երթի ընթացքում մի քանի անգամ բախումներ եղան ակցիայի մասնակիցների եւ ոստիկանների միջեւ: Ոստիկանները, հղում անելով համապատասխան օրենքին, պահանջում էին, որ ակցիայի մասնակիցները բացեն դեմքերրը, իսկ վերջիններս չէին ենթարկվում ոստիկանների պահանջին:
Այդ բախումների արդյունքում ոստիկանները Հանրապետության հրապարակում բերման ենթարկեցին դիմակը հանելու պահանջին չենթարկվող Գոհար Սարոյանին:
Դրանից հետո ակցիայի մասնակիցների կողմից հնչեց առաջարկ, որ բոլորը կրեն դիմակներ եւ եղան կոչեր՝ ուղղված ոստիկաններին՝ ձերբակալեք բոլորիս:
Այս պահին լարված իրավիճակը շարունակվում է:
Հանրապետության հրապարակում ոստիկանները փակել են ակցիայի մասնակիցների ճանապարհը:
Ներկա պահին վեճ է ընթանում ակցիայի մասնակիցների միջեւ, մի մասը պահանջում է հանել դիմակները եւ շարունակել խաղաղ ակցիան, մյուսները պնդում են, որ դիմակներով է պետք շարունակել:
Նելլի ԳՐԻԳՈՐՅԱՆ
Լուսանկարները՝ «Ֆոտոլուրի»:
Օրինակ էս էրեխեքին ինչու են հանել փողոց? Որ ինչ? Ում համար? Ում է պետք էս ապուշությունը? Էս է «դեմոկրատիան»? Նպատակը որն է? Այն, որ լրագրողը գրի «լարված իրավիճակ է»? Ում է ձեռնտու, որ երկրում անպայման «լարված իրավիճակ» լինի? Ում հանգիստ չի տալիս մեր երկրի խաղաղ վիճակը??????
Գետինը մտնեն էս անմեղ էրեխեքին փողոց հանողները: Երեխեք ջան, մի դարձեք գործիք դրանց ձեռքը, մի օր էլ հենց իրենք մի թաքուն տեղից կկրակեն(սովոր են սադրանքների), հետո հարյուր տարի չեն գտնի կրակողին,իսկ ձեզնից մի քանիսը էշ նահատակ կդառնան: Ում շահերի համար եք ձեզ վտանգում ախր: Իրենք(կազմակերպիչները) թքած ունեն ձեր վրա: Ուշքի եկեք: