Նման ամրագրում է արված սահմանադրական
բարեփոխումների հայեցակարգում
«Սահմանադրության երկրորդ հոդվածով նախատեսված` ժողովրդի` իր կողմից իշխանություն ձեւավորելու սահմանադրական սկզբունքը հետեւողականորեն չի գործում»,- նման ամրագրում է արված սահմանադրական բարեփոխումների հայեցակարգում: «Առավոտի» հետ զրույցում ՀՅԴ-ական պատգամավոր Արծվիկ Մինասյանը, ով ուսումնասիրել է հայեցակարգը, կարծիք հայտնեց, որ սահմանադրական բարեփոխումների մասնագիտական հանձնաժողովի ներկայացրած հայեցակարգում արձանագրվում են մեծածավալ աշխատանք, բավական լուրջ վերլուծություն եւ ախտորոշումներ, որոնք եթե ամփոփելով գնահատենք, պետք է արձանագրենք, որ նախորդ փոփոխությունների իրագործումից սկսած մինչեւ այսօր ձեւավորված գրեթե բոլոր խնդիրներն արձանագրված են հայեցակարգում: Հայեցակարգում ներկայացված է 12 հիմնական խնդիր: Կարեւոր ամրագրումներից մեկն էլ այն է, որ «գործադիր իշխանության գործառույթներն անկատար են, եւ նկատի առնելով սահմանադրական կարգավորումները՝ գործադիր իշխանությունը երկատվածության ներքո է գտնվում»:
Այսինքն՝ շատ լիազորություններ, որոնք կառավարությունը պետք է իրագործեր, ներկայումս վերագրվում են նախագահին, եւ Սահմանադրությամբ նախագահը կարող է միջամտել կառավարության գործերին այնքանով, որքանով որ դա չբխի նաեւ կառավարության հռչակած նպատակներից: Երրորդ կարեւոր արձանագրումն, ըստ ՀՅԴ-ական պատգամավորի, այն է, որ ընտրական համակարգը եւ հանրաքվեի առ այսօր գործող ինստիտուտը չեն ապահովել իշխանության ընտրովիության, հաշվետվողականության եւ փոփոխելիության մոտեցումները: «Սա, ըստ էության, նշանակում է, որ մասնագիտական հանձնաժողովն արձանագրում է` մեր երկրում այսօրվա իրավակարգավորումների ներքո չի եղել, չի գործում այնպիսի ընտրական համակարգ, որը հանրության մոտ կապահովի լիարժեք վստահություն, հանրության առաջ հաշվետվողական իշխանություն կձեւավորի, եւ որ ամենակարեւորն է` այդ իշխանությունը կարող է նաեւ փոփոխվել ընտրությունների միջոցով»:
ՆԵԼԼԻ ԳՐԻԳՈՐՅԱՆ
Կարդացեք նաև
Զրույցն ամբողջությամբ`
«Առավոտի» առաջիկա համարներում:
«Առավոտ» օրաթերթ
04.11.2014
