«Հովիկ Աբրահամյանն ասաց, որ վսյո, տղերք, մտնում եք հարկային դաշտ: Կա՞ մեկը, որ մտել է ազնվորեն, գոնե անունն ասեք, շնորհակալ լինենք»: Այսօր 2015-ի բյուջեի քննարկման ժամանակ ՕԵԿ խմբակցության ղեկավար Հեղինե Բիշարյանն այսպիսի հարց ուղղեց ֆինանսների փոխնախարար Արմեն Ալավերդյանին:
Ըստ Հեղինե Բիշարյանի՝ «Չպետք է ձեւական հավաքվեք նիստ անեք, այլ ամեն մարդ սկսի ինքն իրենից: Եթե գիտենք, որ խոշոր գործարարը, այս հյուրանոցը չեն գալիս հարկային դաշտ, եկել կպել եք ՓՄՁ-ներից»:
Արմեն Ալավերդյանը հայտարարեց՝ վարչապետի հայտարարությունից հետո առանձնացվել են այն կազմակերպությունները, որոնց մոտ ստվեր կա. «Այդ ցանկի մեջ ներառվել են բացառապես ԱԱՀ-ով աշխատող ընկերություններ, ոչ մի ՓՄՁ չկա: Ընդ որում, բոլորիս կողմից շատ սիրված եւ ճանաչված ընկերություններ կան»:
Պատգամավորները հետաքրքրվեցին՝ ո՞վ է եղել, ո՞ր գործարարն է այդ «սիրվածը»: Վարդան Այվազյանը ծիծաղեց եւ ռեպլիկ արեց. «Շաքարաքլորը»՝ հավանաբար նկատի ունենալով շաքարի բիզնեսով հայտնի Սամվել Ալեքսանյանին:
Կարդացեք նաև
Արմեն Ալավերդյանն ասաց, որ այդ ստվեր ունեցող կազմակերպությունների վրա լրացուցիչ պարտավորություն է դրվել 7.2 մլրդ դրամ. «Ֆիննախի կայքում 10 օրը մեկ արդյունքները հրապարակում ենք: Այդ 7.2 մլրդը ամբողջությամբ հավաքվել է: Հիմա լա՞վ է»:
Հռիփսիմե ՋԵԲԵՋՅԱՆ
