«Ցանկալի կլինի, որ Գարեգին Նժդեհի արձանը տեղադրված լիներ համանուն հրապարակում»,-այսօր «Հայելի» ակումբում լրագրողների հետ զրույցում ՀՀԿ խմբակցության պատգամավոր Սուքիաս Ավետիսյանը այսպիսի կարծիք հայտնեց Գարեգին Նժդեհի արձանի տեղադրման մասին:
Երևանի քաղաքապետարանի «Բարև Երևան» խմբակցության անդամ Անահիտ Բախշյանը ևս կարծում է, որ ճիշտ կլիներ, որ Նժդեհի արձանը համանուն հրապարակում տեղադրվեր, բայց քանի որ ավագանու նիստին լուրջ ընդվզում է եղել այս հարցում, ստիպված կողմ են քվեարկել: Տիկին Բախշյանը մանրամասնեց. «Արձանը Նժդեհի կեցվածքին հարիր է: Այն տպավորիչ է: Եթե տեղադրվեր Նժդեհի անվան հրապարակում, ավելի կամբողջացներ պատկերը: Մենք ավագանու նիստում առաջարկեցինք որոշումը հետաձգել հաջորդ նիստին, հասարակության կարծիքը լսել, սակայն չընդունվեց»:
Հիշեցնենք, որ որոշում է կայացվել Գարեգին Նժդեհի արձանը տեղադրել Հանրապետության փողոցում գտնվող նորակառույց հրապարակում, որը կանվանակոչվի Նժդեհի անունով:
Տաթև ՀԱՐՈՒԹՅՈՒՆՅԱՆ
Կարդացեք նաև
