Ես զարմացած եմ այս լերթ վիճակից,
Մարդկանց անտարբեր, սառը պահվածքից,
Նրանց՝ օրեցօր նվաստացումից,
Հիմարի առջև ստորացումից:
Ես զարմացած եմ մերկ հայացքներից,
Եվ չկշտացող արարածներից,
Միայն շահ փնտրող, լուռ քծնողներից,
Նյութին խոնարհվող բազում այրերից:
Ես զարմացած եմ մարդու տեսակից,
Նրա հանձնվող, գաղջ էությունից,
Պատեհ, անպատեհ քծնող ժպիտից,
Լրջության կարոտ՝ կեղծ լրջությունից:
Ես զարմացած եմ այս խեղճությունից,
Եվ ձևով լեցուն՝ հպարտությունից,
Խեղճի հայացքով՝ անզորությունից,
Հեշտ վաճառվելու մոլի ձգտումից:
Կարդացեք նաև
Ես զարմացած եմ աննամուս վարքից,
Հեշտ ենթարկվելու սովորությունից,
Իրար մատնելու վարպետությունից,
Սեփական շահը միշտ վեր դասելուց:
Ես զարմացած եմ դավաճան վարքից,
Ու հարմարվելու անվարան բարքից,
Սուրբ արժեքները հեշտ զիջողներից,
Լուրջ արտաքինով՝ դատարկ մարդկանցից:
Ես զարմացած եմ անմիտ խաղերից,
Եվ միշտ շահարկվող էժան քայլերից,
Օտար բարքերի՝ հեշտ յուրացումից,
Անձնվիրաբար, լուռ ծառայելուց:
Անանիա ՄԱՂԱՔՅԱՆ
