«Գյուղատնտեսությունն այսօր ընդհանրապես ադապտացված չէ հարկային դաշտին, պետությունը լավ կանի կոոպերացիաներին ազատի հարկերից»,-այսօր «Հենարան» մամուլի ակումբում ասաց «Հայաստանի ագրարագյուղացիական միավորման» նախագահ Հրաչ Բերբերյանը:
Ըստ նրա, գյուղացու վիճակը կլավանա, եթե պետության դոտացիաները հասնեն նրան, այլ ոչ թե ճանապարհին անհետանան, ինչպես որ հայտնաբերել էր Վերահսկիչ պալատը ոլորտում կատարած ստուգումների արդյունքում. «Վերջապես մեկը պե՞տք է պատժվի մեզ մոտ, որ ցույց տանք մեկը պատասխան է տալիս»:
Պարոն Բերբերյանի խոսքերով, այս տարի բնակլիմայական պայմանների պատճառով, միայն ծիրանի բերքի մասով 30 միլիոն դոլարի վնաս եղավ:
Կարտոֆիլի բերքի համար էլ տարին բարենպաստ չէր եւ 50-ից 80 հազար տոննայի կարտոֆիլի կորուստ ենք ունեցել:
Կարդացեք նաև
Հրաչ Բերբերյանը կապերի մեջ է համաշխարհային ֆերմերների հետ եւ հավաստիացրեց, որ միջազգային շուկայում ցորենի գները կայուն են:
Հարցին, թե Եվրասիական տնտեսական միությանը միանալու դեպքում հնարավո՞ր է մեզ մոտ գյուղատնտեսական ապրանքների դեֆիցիտ լինի, քանի որ կմեծանան արտահանման ծավալները, Հրաչ Բերբերյանն ասաց. «Երբեք էլ շուկայում դեֆիցիտ չի լինի, այն ինչ որ արտահանվելու է՝ կարտահանվի, այն ինչ որ մնալու է Հայաստանում՝ կմնա: Ով որ ասում է, որ մենք Մոսկվան կլցնենք կարտոֆիլով՝ դեմագոգիա է»: Ըստ նրա, այսօր գյուղացին որեւէ խնդիր չունի իր արտադրանքը ավելացնելու, բայց այդ ուղղությամբ կառավարությունը որեւէ աշխատանք չի տանում նրան օգնելու:
Գյուղոլորտի մասնագետն ասաց, որ ՀԷԿ-երի պատճառով ոռոգման համակարգը երկու տարի է՝ ձախողված է աշխատում, եւ եթե այդ հարցը չլուծվի եկող տարիներին էլ նույնը կունենանք. «Գյուղատնտեսական ջրի վրա բերել բիզնես են անում»:
Ինչ վերաբերում է այս օրերի ցրտերին, ապա պարոն Բերբերյանն ասաց, որ չեն ազդի գյուղատնտեսության վրա. «Արտառոց ցրտեր չկան, եւ պետք է հասկանանք, որ ձմեռ է մոտենում»: Բայց մտահոգություն հայտնեց, որ եղանակի տեսության՝ սաստիկ ցրտերի մասին հայտարարությունը փոքր-ինչ վնասներ հասցրեց գյուղացիներին. «Մարդիկ կան՝ ստեղծված են աժիոտաժ ստեղծելու համար, այն վնասները, որ գյուղացին կրեց, ո՞վ պետք է փոխհատուցի, կաղամբը փոքր-փոքր քաղեց, սմբուկը եւս, ո՞վ պետք է փոխհատուցի: Նա համոզված է՝ ով կառավարության նիստում հայտարարել է, թե ցրտահարություն է սպասվում, նա էլ պետք է փոխհատուցի գյուղացիներին»:
Նշենք, որ կառավարության նիստում ջերմաստիճանի կտրուկ իջնելու մասին հայտարարել էր արտակարգ իրավիճակների նախարար Արմեն Երիցյանը:
Լուսինե ԲՈՒԴԱՂՅԱՆ
