«Եթե դուք տեսնում եք նման հիմքեր, խնդրում եմ լինքը ինձ ուղարկեք»,- այսօր խորհրդարանում, լրագրողների հետ զրույցում, խոսելով արտահերթ ընտրությունների հավանականության մասին, հումոր արեց ՀՀԿ փոխնախագահ, կրթության եւ գիտության նախարար Արմեն Աշոտյանը:
Պատասխանելով լրագրողներից մեկի հարցին`ի՞նչ կարծիք ունի ԲՀԿ առաջնորդ Գագիկ Ծառուկյանի այն հայտարարության մասին, որ այլևս հետդարձի ճանապարհ չկա, և որևէ մի պաշտոնյա չի կարող չարաշահել իր իրավասությունները, մասնավորապես «փայ մտնել» և այլն, Արմեն Աշոտյանն ասաց. «Կարծում եմ՝ այդ հարցերը պետք է ուղղել Գագիկ Ծառուկյանին, ես Գագիկ Ծառուկյանը չեմ, ցույց տվեք այն փայը, որտեղ ես մտել եմ, և ուղղեք ինձ այդ հարցը»:
Հարցին`անակնկալ չէ՞ր, որ Ծառուկյանն արդեն հստակ խոսեց իշխանափոխության մասին, նա արձագանքեց. «Իշխանափոխությունը ժողովրդավարական պետության ներսում պարբերաբար տեղի ունեցող գործընթաց է: Իշխանափոխություն չի նշանակում իշխանության փոփոխություն, այն նշանակում է ընտրությունների միջոցով նոր իշխանությունների ձևավորում, որը կարող է լինել ինչպես նախորդ քաղաքական ուժերի հաղթանակով, այնպես էլ նոր քաղաքական ուժերի ներգրավմամբ»:
Նելլի ԳՐԻԳՈՐՅԱՆ
