Այսօր ԱԺ-ում առողջապահության ոլորտում 2015-ի բյուջեի նախագծի եկամուտների եւ ծախսերի քննարկման ժամանակ ՀՅԴ պատգամավոր Արծվիկ Մինասյանը ֆինանսների փոխնախարար Պավել Սաֆարյանին դեղերի հայտնի, աղմուկ հանած խնդրի հետ կապված մի հարց ուղղեց. «Դեղերի վրա սահմանվեցին նոր ակցիզային դրոշմանիշներ, որի արդյունքում հիմա դեղերի ներկրմամբ զբաղվող շատ տնտեսվարողներ աղմուկ են բարձրացրել, որ գների աճ է տեղի ունենալու: Ֆինանսավորման հաշվարկման ժամանակ նման կանխատեսում հաշվի առնվե՞լ է: Մտադի՞ր է կառավարությունն այս ուղղությամբ որոշակի մեղմման քաղաքականություն իրականացնել»:
Պավել Սաֆարյանը պատասխանեց, որ այդ հարցին կպատասխանի գրավոր:
ՀՀԿ պատգամավոր Խոսրով Հարությունյանն ասաց, որ շատ նեգատիվ երեւույթներ են առաջանում, երբ պետպատվերով ծառայության համար ավելի ցածր սակագին է հաշվարկվում, քան պրակտիկայում գործող գինն է եւ կոռուպցիայի ռիսկ է առաջանում: Կարո՞ղ ենք մենք գնահատել, որ այսօր պետպատվերի գներն ավելի են մոտեցվել իրական գներին:
Պավել Սաֆարյանն ասաց, որ կառավարությունը շահագրգիռ է, որ ունենանք իրատեսական գներ. «Եթե ինչ-որ խնդիրներ կան ֆինանսական, դա իրական գների առկայության բացակայությունն է: Մի մեծ սահմանափակում կա՝ մեր ֆինանսական միջոցները: Կիսում եմ գնահատականը, բայց պետք է հաշվի առնել նաեւ մեր ֆինանսական հնարավորությունները: Իրական գների դեպքում պետք է կրճատել շահառուների թվաքանակը»:
Խոսրով Հարությունյանի դիտարկմամբ՝ լուծումը բժշկական ապահովագրության ներդրումն է. «Այս ուղղությամբ ես չեմ նկատում քայլեր: Կյանքի կենսամակարդակը բարձրացնելուն զուգահեռ մեր կարիքներն էլ են բարձրանում»:
Կարդացեք նաև
Հռիփսիմե ՋԵԲԵՋՅԱՆ
