Միջոցառումները սկսվում են հունվարի 28-ից՝ բանակի օրվանից, եւ ավարտվում են դեկտեմբերի 7-ին` 1988 թվականի երկրաշարժի զոհերի օրը
«Պաշտպանության, կրթության եւ գիտության նախարարությունների եւ «Երկրապահ կամավորների» միջեւ կնքված հուշագիրը ուսումնական հաստատություններում «Պատանի երկրապահ» ակումբների ստեղծման վերաբերյալ նոր բովանդակային ուղղվածություն է հաղորդել սերնդի ռազմահայրենասիրական դաստիարակությանը»,- այսօր՝ նոյեմբերի 1-ին, Հանրակրթական դպրոցներում 2014-2015 ուստարում «Պատանի երկրապահ» ակումբների ձեւավորման եւ հայրենասիրական դաստիարակությանն ուղղված միջոցառումների ուղեցույցի շնորհանդեսի ընթացքում հայտարարեց պաշտպանության նախարարության քարոզչության եւ հասարակայնության հետ կապերի վարչության պետ Վարդան Ավետիսյանը:
Շնորհանդեսին ներկա էին կրթության եւ գիտության նախարար Արմեն Աշոտյանը, պաշտպանության նախարար Սեյրան Օհանյանը, «Երկրապահ կամավորականների միություն» հասարակական կազմակերպության նախագահ Մանվել Գրիգորյանը:
Հանրակրթական դպրոցներում 2014-2015 ուստարում «Պատանի երկրապահ» ակումբների ձեւավորման ե հայրենասիրական դաստիարակությանն ուղղված միջոցառումների ուղեցույցում միջոցառումները սկսվում են հունվարի 28-ից՝ բանակի օրվանից, եւ ավարտվում դեկտեմբերի 7-ին՝ 1988 թվականի երկրաշարժի զոհերի օրը:
Կարդացեք նաև
Վարդան Ավետիսյանը նշեց, որ պաշտպանության նախարարությունը ձեռնարկի կազմման ընթացքում առաջարկել է հայրենասիրական դաստիարակության վերաբերյալ ներառել մի շարք տոնական օրեր. «Մենք այդ միջոցառումները հակիրճ ներառել ենք այս ուղեցույցի մեջ այն ակնկալիքներով, որ երկրորդ ուղեցույցի պատրաստման պարագայում մենք արդեն ավելի լայնընդգրկում ուղեցույց կունենանք»:
Ուղեցույցում ընդգրկված միջոցառումները նախատեսվում են անցկացնել տարրական, հիմնական եւ ավագ դպրոցներում: Վարդան Ավետիսյանի խոսքերով՝ տարրական դպրոցներում նախատեսվում է բանակի օրվան նվիրված միջոցառումները կազմակերպվել պարզ եւ մատչելի զրույցների, շարադրությունների, մանկական գրականության ընթերցանության, կինոնկարների դիտումների եւ տարբեր մրցույթների միջոցով. «Իսկ հիմնական դպրոցներում դասերը կանցկացնեն հիմնականում զինվորականները: Թեմատիկ պարապմունքներ, երեկոներ, բանավեճեր քննարկումներ եւ այլ դասախոսություններ կանցկացվեն: Շարադրությունների մրցանակաբաշխություններ՝ «Ես զինվոր եմ», «Հայոց բանակ», «Արցախյան ազատամարտ» եւ այլ խորագրերով: Կպատրաստվեն ռեֆերատներ, կազմակերպվեն ցուցահանդեսներ: Ավագ դպրոցներում հիմնականում նախատեսվում են արիության դասեր, հարց ու պատասխանի երեկոներ, աշակերտական կոնֆերանսներ, հանդիպումներ կլոր սեղանի շուրջ»:
Ամի ՉԻՉԱԿՅԱՆ
