«Անցած երեք ամիսների ընթացքում երկու շատ տագնապալի դեպքեր ունեցանք»,- այսօր՝ հոկտեմբերի 31-ին, «Հենարան» մամլո ակումբում լրագրողների հետ հանդիպման ընթացքում, ներկայացնելով Խոսքի ազատության պաշտպանության կոմիտեի 2014 թվականի երրորդ եռամսյակի (հուլիս-սեպտեմբեր) զեկույցը, հայտարարեց կոմիտեի նախագահ Աշոտ Մելիքյանը:
Այդ դեպքերից մեկը պատահել էր Ազգային ժողովի մուտքի մոտ, երբ ԱԺ-ի անվտանգության ծառայության պետը ֆիզիկական բռնության էր ենթարկել «Ա1+»-ի թղթակից Մարինե Խաչատրյանին եւ խոչընդոտել նրա մասնագիտական գործունեությանը. «Ամենավատն այն է, որ ամբողջ այդ միջադեպը նկարահանված է եղել եւ դրվել է համացանցում: Հատուկ քննչական ծառայությունը սկզբից քրեական գործ հարուցելու հիմք չտեսավ, եւ այն բանից հետո, որ դատախազությունը պարտադրեց վերադառնալ այդ խնդրին, քրեական գործը հարուցվեց»:
Նա նշեց, որ հինգշաբթի՝ հոկտեմբերի 30-ին, Մարինե Խաչատրյանը հրավիրվել է ՀՔԾ: Խոսքի ազատության պաշտպանության կոմիտեի իրավաբան Օլգա Սաֆարյանը իր հետ է եղել եւ ներկայացրել է նրա շահերը. «Այս գործը հատկանշական է, երբ ՀՔԾ-ն եւ առհասարակ իրավապահները փորձում են կոծկել միջադեպերը, որոնք տեղի են ունենում լրագրողների հետ: Եվ անպատժելիության մթնոլորտն է, որ այդպիսի հանցագործություններ է ծնում: Մենք համարում ենք, որ այդ պետական ծառայողը, որը խոչընդոտել է լրագրողի աշխատանքը, պետք է պատասխանատվության ենթարկվի»:
Աշոտ Մելիքյանի կարծիքով՝ պետք է պատասխանատվության ենթարկվի նաեւ այն անձը, որը «Հայաստան-սփյուռք» համաժողովի ընթացքում խոչընդոտել է «Հայկական ժամանակ» օրաթերթի թղթակցի աշխատանքը:
Կարդացեք նաև
Ամի ՉԻՉԱԿՅԱՆ
