Գյուղատնտեսական տեխնիկայի պետական տեսչության պետ Վարդան Ղուշչյանն այսօր Գյուղատնտեսության նախարարությունում ամփոփեց 2014 թվականին հանրապետություն գյուղատնտեսական տեխնիկայի ներկրման արդյունքները, որոնց համաձայն, 2014 թվականի հունվարի մեկի դրությամբ հանրապետությունում կա 14 հազար 782 տրակտոր, 1355 հատ հացահատիկավար կոմբայն, 2030 հատ տրակտորային խոտհնձիչ եւ այլն:
Ըստ պրն Ղուշչյանի ներկայացրած տվյալների՝ նշված տեխնիկայի սարքինության մակարդակը մոտ 79 տոկոս է, իսկ տեխնիկայի 93 տոկոսը խորհրդային արտադրության են՝ մաշված՝ 1986-1991 թվականի արտադրության: Մնացյալը Հնդկաստանի, Ճապոնիայի եւ Չինաստանի կողմից տրվող դրամաշնորհների արդյունքում ձեռք բերված տեխնիկա է:
«Նաեւ Բելառուսում տրակտոր արտադրող ընկերությունների հետ նախարարության վարած բանակցությունների արդյունքում հանրապետություն է ներկրվել եւ շուկայականից մոտ 30 տոկոս ցածր գներով տնտեսվարողներին է տրամադրվել 288 տրակտոր, 20 մամլիչներ, 20 կուլտիվատորներ, 40 գութան, 34 կարտոֆիլաքանդիչներ, 16 շարքացաններ»,- նշեց պրն Ղուշչյանը:
Տեխնիկան տրվում է լիզինգային եղանակով՝ տարեկան 9 տոկոս տոկոսադրույքով, կանխավճարը՝ գնի քսան տոկոսի չափով: 2014 թվականին հանրապետության արոտօգտագործողների միավորումներին է տրամադրվել 467 միավոր գյուղտեխնիկա, որից 115-ը տրակտոր:
Կարդացեք նաև
Հաշվետվությունը՝ մանրամասն՝ տեսանյութում
Էլյա ՀՈՎՀԱՆՆԻՍՅԱՆ
