Ագաթանգեղոս փողոցի 7-րդ շենքը 11 հարկանի է, բաղկացած 9 մուտքից: Առաջին մուտքում աղբատարը առնետների եւ խոշոր չափերի հասնող խավարասերների գոյատեղի է դարձել, որոնք մտնում են վերելակ ու բնակարաններ:
Այն լինելով Երեւան քաղաքի ամենամեծ շենքերից մեկը, որն ունի շուրջ 270 բնակարան, բնակիչներին խուճապի մեջ է պահում: Բնակիչների փոխանցմամբ, իրենք բազմիցս դիմել են համատիրություն, թաղապետարան, մի շարք գրավոր դիմումներ գրել՝ հարցի առնչությամբ, սակայն ապարդյուն:
Ստեղծված իրավիճակի պատճառը հետեւյալն է՝ այս հասցեում տեղակայված աղբատարի աղբը հաճախակի չի տարվում, դրան գումարած, կողքի շենքերի բնակիչներն էլ են իրենցը բերում այստեղ լցնում:
Այս անտարբերության մատնված շենքում, պարզվում է՝ աղբատարի եւ վերելակի հորի պատը վաղուց քանդվել է, ինչի արդյունքում էլ այն առնետանոցի է վերածվել, ու առանց չափազանցության՝ խմբերով շրջում են ոչ միայն վերելակում, այլեւ հարկերում: Բնակիչները ահազանգում են՝ ուշադրություն դարձնող չկա:
Հավելենք նաեւ, որ շենքի տակ գործում են մի շարք խանութներ, իսկ մուտքի կեսը ՀՀ երկրորդ նախագահ Ռոբերտ Քոչարյանի խնամին՝ ԱԺ պատգամավոր Վոլոդյա Բադալյանը սեփականաշնորհել ու վարձով է տրամադրում: Բանն այն է, որ այս մուտքն ունի 30 բնակարան, որոնցից մոտավորապես 20-ն է բնակեցված, իսկ այդ 20 բնակարանից հաստատ այսպիսի աղբ չի կարող գոյանալ:
Եվա ՀԱԿՈԲՅԱՆ
