«Փոքր եւ միջին բիզնեսը տնտեսության շարժիչ ուժն է, եւ արեւմտյան երկրների մեծ մասում ՓՄՁ-ներին վերաբերում են որպես «կուռքի», մշտապես նրանց աջակցող ծրագրեր են իրականացնում, ինչը չի արվում Հայաստանում»,- այսօր «Անալիտիկ» կենտրոնում անդրադառնալով Հայաստանում ՓՄՁ խնդիրներին՝ նշեց Քաղաքական գիտությունների հայաստանյան ասոցիացիայի անդամ, տնտեսագետ Մհեր Փարվանյանը:
Բանախոսը նաեւ մեկնաբանեց «Շրջանառության հարկի մասին» օրենքում կատարվելիք փոփոխությունները եւ նշեց, որ փաստաթղթավորումը ՓՄՁ-ների համար անհրաժեշտ է. «Փաստաթղթերը, իհարկե, որոշակի ռիսկերից ապահովում են: Սակայն կառավարությունը հայտարարում է, որ փաստաթղթավորումը մեծ բիզնեսին ստվերից հանելու նպատակ ունի, իսկ այս պարագայում փոքր եւ միջին բիզնեսը դառնում է գործիք, ոչ թե տնտեսության շարժիչ ուժ»:
Ասուլիսի մեկ այլ մասնակից, տնտեսական գիտությունների թեկնածու Եղիշե Սողոմոնյանն էլ ներկայացրեց իր առաջարկները, թե ինչպես կարելի է Հայաստանում զարգացնել ՓՄՁ դաշտը եւ նշեց, որ երկրում ՓՄՁ դաշտի զարգացման համար չկա պետական աջակցություն, ծրագրեր չեն իրականացվում. «Չկան արտոնյալ վարկավորումներ, որոնք կազատեին ՓՄՁ-ներին հարկերից: Պետությունը նաեւ կարող է մի քաղաքականություն մշակել, որով հնարավոր կլինի ներմուծվող ապրանքները փոխարինել տեղական արտադրանքով՝ այս կերպ խթանելով ՓՄՁ-ների աշխատանքը»: Բանախոսը նաեւ առաջարկում է, որպեսզի պետության տնտեսական համակարգում կիրառեն ոչ թե կարճաժամկետ ծրագրեր, այլ երկարաժամկետ աջակցման եւ ֆինանսավորման ծրագրեր:
Եղիշե Սողոմոնյանի կարծիքով՝ «շրջանառության հարկը անիմաստ հարկատեսակ է», քանի որ, ըստ նրա, մինչեւ շրջանառության հարկը կիրառելը շահութահարկերի մասին օրենքով ՓՄՁ-ները ավելացված արժեքի հարկ չէին վճարում եւ վճարում էին միայն շահութահարկ ու այդ դեպքում փաստաթղթավորման բոլոր խնդիրները լուծվում էին:
Բանախոսները նաեւ մեկնաբանեցին, թե ինչ արտոնություններ կստեղծվեն Հայաստանում ՓՄՁ-ների համար ԵՏՄ անդամակցությունից հետո: Ըստ Մհեր Փարվանյանի՝ ԵՏՄ-ն նախատեսում է հարկման միասնական սկզբունքների մշակում եւ կիրառում եւ որ հարկային ոլորտում կլինեն դրական փոփոխություններ, քանի որ կազմակերպությունները համարվելու են ռեզիդենտներ ԵՏՄ տարածքում:
Կարդացեք նաև
Եղիշե Սողոմոնյանի խոսքով էլ՝ մինչ անդամակցության փաստաթուղթը ստորագրելը, անհրաժեշտ էր ստեղծել մի խումբ, որը քննարկումներ կիրականացներ ՓՄՁ ներկայացուցիչների հետ, կհաշվարկեր առավելություններն ու թերությունները, հետո կստորագրեր փաստաթուղթը:
Էլյա ՀՈՎՀԱՆՆԻՍՅԱՆ
