«2015-ի հունիսի 1-ից 55 հազար դրամից պակաս աշխատավարձ չի լինելու»,- այդ մասին այսօր 2015-ի բյուջեի քննարկման ժամանակ ասաց ֆինանսների փոխնախարար Պավել Սաֆարյանը՝ ներկայացնելով սոցիալական ոլորտի համար նախատեսված ֆինանսական միջոցները:
Ընտանեկան նպաստի համար 2014-ին նախատեսվել էր 37 մլրդ դրամ, իսկ 2015-ի համար նախատեսվում է 38 մլրդ 386 մլն դրամ:
«Այդ ավելացումը պայմանավորված է հետեւյալ հանգամանքով. Կառավարությունը նպաստների գումարը ավելացրեց 1000-ական դրամով՝ կապված էլեկտրաէներգիայի թանկացման հետ: Եվ այս ավելացումը պայմանավորված է սրա հետ: Նպաստառուների քանակը չի փոխվել՝ 14 հազար 684 ընտանիք: Ընտանեկան նպաստի միջին ամսական ցուցանիշը 29 հազար 537 դրամի դիմաց կազմելու է 30 հազար 537 դրամ: Երեխայի ծննդյան նպաստը 50 հազար դրամը պահպանվել է, մինչեւ 2 տարեկան երեխայի խնամքի 18 հազար դրամ ամսական նպաստը նույնպես պահպանվել է: 3- րդ եւ 4-րդ երեխայի միանվագ նպաստի չափը նույնպես մնացել է նույնը՝ 1 մլն դրամ»,- ասաց Պավել Սաֆարյանը:
Ինչ վերաբերում է կենսաթոշակներին, միջին ամսական աշխատանքային կենսաթոշակն է միայն փոխվել: 2014-ին գործող ամսական 36 հազար դրամի դիմաց ծրագրավորվել է 41 հազար դրամ՝ մոտ 14 տոկոսով աճել է:
Կարդացեք նաև
Սպայական անձնակազմի միջին կենսաթոշակն է բարձրանալու 49 հազար դրամը դառնալու է 57 հազար դրամ: Այսպիսով, ավելացել է նպաստը, աշխատանքային թոշակը եւ նվազագույն աշխատավարձը:
ՀՀԿ խմբակցության պատգամավոր Խոսրով Հարությունյանը հարցրեց՝ Կուտակային կենսաթոշակի ներդրման ծրագրով 13 մլրդ է նախատեսված, իսկ նախորդ տարի 20 մլրդ էր նախատեսվել, այդ նվազումն ինչո՞վ է պայմանավորված: Պավել Սաֆարյանը պատասխանեց, որ դա պայմանավորված է օրենսդրության փոփոխությամբ, արդեն սահմանված է, որ միայն պետական ծառայողների համար է պարտադիր կուտակային կենսաթոշակը եւ կամավորության սկզբունքով:
ԲՀԿ պատգամավոր Միքայել Մելքումյանը հարցրեց՝ քանի՞ հոգի է ստանում նվազագույն աշխատավարձ: Պավել Սաֆարյանը խոստացավ մանրամասն տեղեկատվություն տալ հետո, որովհետեւ ձեռքի տակ այդ տվյալները չուներ:
Հռիփսիմե ՋԵԲԵՋՅԱՆ
