Աշտարակի բնակիչները նամակով դիմել էին Սերժ Սարգսյանին, վարչապետին, գլխավոր դատախազությանը, ոստիկանապետին՝ բողոքելով Արագածոտնի մարզպետից: Նամակում գրել են, որ նա պաշտոնների նշանակելու համար կաշառք է վերցնում, անգամ դպրոցների տնօրեններին ու ուսուցիչներին ինքն է տեղավորում՝ ըստ վճարած գումարի, ոչ թե գիտելիքների:
Aravot.am-ի հետ զրույցում մարզպետ Սարգիս Սահակյանը սկսեց ծիծաղել, երբ թվարկեցինք նամակում նշված ապօրինությունները, որոնք վերագրվում են իրեն: Նա վստահեցրեց. «Դրանք իրականությանը չեն համապատասխանում: Այդ նամակը Աշտարակի բնակիչները չեն գրել»:
Մեր հարցին՝ ո՞վ է գրել՝ մարզպետը պատասխանեց, որ բնակչի անուն այդ նամակի տակը չկա: Դիտարկմանը, որ հնարավոր է վախենում են եւ անուններով չեն ներկայանում՝ մարզպետը հակադարձեց. «Ինչի՞ց են վախենում: Հիմա ցանկացած մարդ կարա գրի ձեր ընկերոջ վրա, որ նա այսօր ատոմակայան է տեղափոխել Քուվեյթից մինչեւ Իրաք ու անուն-ազգանուն չլինի»:
Այդ նամակում նշել էին, որ ամբողջ մարզի միլիարդավոր դրամներ արժեցող շինարարական մրցույթներում հիմնականում հաղթում է մարզպետի եղբայրը՝ Նաիրի Սահակյանը, որ մարզպետն «ատկատ» է անում:
Կարդացեք նաև
Այս առնչությամբ մարզպետը պատասխանեց. «Նաիրին Հայաստանի Հանրապետության քաղաքացի է եւ իրավունք ունի մասնակցելու մրցույթներին: Նախընտրել են Նաիրիին, Նաիրին է շահել, որի իրավունքն ունի: Դուք էլ իրավունք ունեք մասնակցել: Ինքը մի կազմակերպություն ունի՝ «Ես եւ նա»:
Շատ է խոսվում նաեւ այս մարզպետի անձնական հարաբերությունների մասին՝ նախագահ Սերժ Սարգսյանի ընտանիքի եւ հատկապես եղբայրների հետ: Սարգիս Սահակյանը պատասխանեց, որ ինքը Հանրապետական կուսակցության նախագահի ենթական է եւ պարտավոր է Սերժ Սարգսյանի ցանկացած հանձնարարություն պետական ապարատի հետ կապված իրագործելու. «Ես անձնական կապ չունեմ»:
Հռիփսիմե ՋԵԲԵՋՅԱՆ
