Նա մի ամիս քնել է անասնագոմում:
Մեզ է դիմել Ադրբեջանին սահմանամերձ Դովեղ գյուղի բնակիչ, 1972 թ. ծնված Վահագն Ամիրխանյանը: Նա 1993թ. ավարտել է Ստեփանավանի անասնաբուժական-անասնաբուծական տեխնիկումը, մասնագիտությամբ անասնաբույծ է: Նրա հայրը՝ Արամ Ամիրխանյանը, խորհրդային շրջանում շուրջ 32 տարի Դովեղում անասնապահական ֆերմայի վարիչ է աշխատել: 2005-2014 թթ. Վահագնը չէր եղել Հայաստանում, հոկտեմբերի 5-ին է Ղարաբաղից եկել Դովեղ:
Ամուսնալուծված Վահագնը մինչ Ղարաբաղի Մարտակերտ քաղաք մեկնելը Բագրատաշենի շուկայում բեռնակրությամբ է զբաղվել: Բագրատաշենում հանդիպել է այնտեղ առեւտրի եկած, Մարտակերտի բնակչուհի , 1955թ. ծնված Օֆելյա Օհանջանյանին:
Կարդացեք նաև
Վ. Ամիրխանյանն ասաց, որ 5 տարի՝ 2005թ. օգոստոսի 25-ից մինչեւ 2010թ. նոյեմբերի 30-ը ինքն աշխատել է Օֆելյա Օհանջանյանի մոտ, Մարիամ» ՍՊԸ-ում, զբաղվել անասնապահությամբ, սակայն աշխատավարձ չի ստացել: «Մարիամ» ՍՊԸ տնօրենը Օֆելայի ամուսինն է՝ Գրիշա Սարգսյանը, ով անասնապահների հանդեպ ավելի վատ է վերաբերել, քան՝ իր կինը:
Վ. Ամիրխանյանն ասաց, որ Գ. Սարգսյանը իրեն մեկ ամիս պահել է անասնագոմի մեջ՝ հորթերի եւ ոչխարների հետ, գոմի դուռը գիշերը մետաղալարով փակել է, որ Վահագնը դուրս չգա: Վերջինիս խոսքերով՝ մինչ իր գնալը Օհանջանյանի մոտ անասնապահ է աշխատել Հայաստանի Մարտունի քաղաքից Գյուլնարա Օհանյանի տղան՝ 12-ամյա Ավետիքը, որը Մարտակերտի դաշտերում անասուն պահելու ժամանակ, 2005թ. օգոստոսի 14-ին նռնակի պայթյունից զոհվել է: Ավետիքի 8-ամյա քույրը՝ Անին, Մարտակերտում արածեցրել է այլ անասնատիրոջ ոչխարները : 2006թ. օգոստոսի 5-ին Վահագնը թունավորվել է, հաջորդ օրը տեղափոխվել է Մարտակերտի հիվանդանոցի ինֆեկցիոն բաժանմունք: Դեռ չէր ապաքինվել, սակայն Օֆելյա Օհանջանյանի հեռախոսազանգ-պահանջով բաժանմունքի վարիչը ամսին 12-ին նրան դուրս է գրել:
Վ. Ամիրխանյանն ասաց, որ ինքը 2 անգամ փորձել է փախչել, սակայն Գ. Սարգսյանը եւ Օ.Օհանջանյանը ավտոմեքենայով իր դեմը կտրել են, վերադարձրել: 2010թ.-ին դժվարությամբ Օ. Օհանջանյանի եւԳ. Սարգսյանի մոտից հեռանալուց հետո Վ. Ամիրխանյանը որպես անասնապահ աշխատել է այլ անձանց մոտ:
Վահագնի վկայությամբ՝ Թալիշ գյուղի բնակիչ Անդրանիկ Սեդրակյանը Կրասնոդարի երկրամասում հետախուզվում է անօրինական օղիներ արտադրելու համար: Անդրանիկը Վահագնին խոստացել է 300 գլուխ ոչխար պահելու համար ամսական 90 հազար դրամ աշխատավարձ վճարել: Ոչխարների թիվը աճելով՝2014թ. գարնանը հասել է 400-ի, սակայն ռոճիկը չի ավելացել:
2010թ. Ստեփանակերտի ոստիկանության քննիչ Բորիս Բախշյանի միջնորդությամբ վերջինիս եղբայրը՝ Միշա Բախշյանը Օ. Օհանջանյանից վերցրել է Վահագն Ամիրխանյանի փաստաթղթերը՝ աշխատանքային գրքույկը, սոցիալական քարտը, վարորդական իրավունքի եւ ծննդյան վկայականները: Մ. Բախշյանին պատկանող, Վ. Ամիրխանյանի պահած կովերից մեկը գայլը կերել է, Միշան դա Վահագնի վրա 250 հազար դրամի վնաս է հաշվարկել: Ծաղկաշեն գյուղի բնակիչԱրթուր Խաչատրյանը այդ գումարը վճարելով՝ Վահագնի փաստաթղթերը վերցրել- հանձնել է իր բիզնես գործընկեր Անդրանիկ Սեդրակյանին: Վահագնը վերջինիս մոտ երկու տարի հինգ ամիս՝ 2012թ. ապրիլի 25-ից մինչեւ 2014թ. հոկտեմբերի 5-ը անասնապահ է աշխատել: Ամսական պետք է ստանար 90 հազար դրամ, որից 40 հազարը հաշվվել է որպես սննդի ծախս: Ընդհանուր 29 ամսվա համար Վահագնը պետք է ստանար 1 միլիոն 450 հազար դրամ: Անդրանիկ Սեդրակյանը նրան ասել է, որ իր փաստաթղթերը կարող է ստանալ, եթե «կորած» թեքայի եւ ուլի եւ փչացած հեռուստացույցի վնասը հատուցի: Վահագնը գրառել է,որ 2013թ. հունիսի 1-ից մինչեւ 2014թ. հոկտեմբերի 5-ը ոչխարի հոտից ընդհանուր 202 գլուխ ոչխարի մորթ, վաճառք եւ հիվանդությունից անկում է եղել:
Վահագնից իմանալով Օֆելյա Օհանջանյանի հեռախոսահամարը՝ զանգահարեցինք նրան: Օֆելյան ասաց, որ Վ. Ամիրխանյանը սուտ է ասում, նա իր մոտ անասնապահ է աշխատել ընդամենը 8 ամիս, ինքը նրա համար մշտապես ծխախոտ է գնել, հագուստ տվել, ամուսնացրել 19-ամյա աղջկա հետ, փակել Բագրատաշենի շուկայում Վահագնի թողած 67 հազար դրամի պարտքը եւ այլն:
12-ամյա Ավետիքի զոհվելու վերաբերյալ նշեց, որ տղան դաշտում պայթուցիկ իր է գտել, ցանկացել դրանից գունավոր մետաղ վերցնել եւ զոհվել է: Վ. Ամիրխանյանն ասաց, որ Օֆելյան իր համար կին է ճարել, ամուսնության հետ կապված ընդհանուր ծախսերը, որ հոգացել է Օֆելյան, եղել է 39 750 դրամ: Վահագնի խոսքերով՝ իրեն տվել են Գրիշա Սարգսյանի հին շորերը եւ «Պրիմա» ծխախոտ:
Զանգահարեցինք անասնապահությամբ զբաղվող մի մարդու, որը Մարտակերտում է բնակվում: Վերջինս խնդրեց, որ իր անունը չհրապարակվի (որպեսզի Օֆելյայի եւ նրա ամուսնու հետ խնդիրներ չունենա), եւ հայտնեց, որ իրականում Վահագնը Օֆելյա Օհանջանյանի մոտ ոչ թե 8 ամիս է աշխատել, այլ՝ ավելի քան 5 տարի:
«9 տարում ես հեռախոս չեմ ունեցել, տարբեր մարդկանց խնդրում էի, նրանց հեռախոսներից զանգահարում հորս, հայրս hետ էր զանգում: Աշխատելով «Մարիամ» ՍՊԸ-ում, բացի ընկերութան անասունները, մեկ տարի պահել եմ նաեւ Վալյա Մկրտումյանի 3 կովը (Վալյան վաճառելով՝ վերջում մնաց մի կով), 10 ամիս՝ Յաշա Ղազարյանի 12 կովը եւ 18 ոչխարը , բաքվեցի Էդիկի 5 կովը, սակայն դրանից ստացված գումարները՝ 140 հազար դրամ, Օֆելյան է ստացել: Ես Օֆելյային հարցրել եմ՝ ինչո՞ւ քո բազմաթիվ խանութների աշխատողները գրանցված են հարկային դաշտում, իսկ անասնապահները եւ կթվորները՝ ոչ: Նա ասաց, թե ինքը անասնապահին ինչո՞ւ պետք է գրանցի»:
7 տարի եւ 7 ամիս Վ. Ամիրխանյանը աշխատել է առանց գրանցվելու, առանց աշխատավարձի: Կարծում ենք, որ այս հարցով պետք է զբաղվեն իրավապահները:
Ոսկան ՍԱՐԳՍՅԱՆ
