Aravot.am-ը Հայաստանի պետական ճարտարագիտական համալսարանի (Պոլիտեխնիկի) տեղեկատվական և հեռահաղորդակցական տեխնոլոգիաների վարչության պետ Վլադիմիր Խոյեցյանից (լուսանկարում) հետաքրքրվեց, ինչպես է վերաբերվում իր եւ իր տեղակալ Վահե Կիրակոսյանի բնակարաններում օրերս կատարված խուզարկությանը, որը հաստատել էր նաեւ քննչական կոմիտեն:
Հիշեցնենք, որ խուզարկությունը կատարվել է Պոլիտեխնիկի ռեկտորի պաշտոնակատար Հովհաննես Թոքմաջյանի ֆեյսբուքյան էջը կոտրելու եւ այնտեղից վարկաբեկիչ տեղեկատվություն տարածելու գործով: Պ
արոն Խոյեցյանն ասաց, որ մեկնաբանելը ճիշտ չի լինի նախաքննական գործընթացի փուլում, նաեւ հավելեց. «Չեմ թաքցնի, որ խուզարկել են, ճիշտ է, բուն երեւույթը հաճելի չէր, բայց հասկանում եմ, որ մարդիկ պետք է անեն ամեն ինչ, որպեսզի բացահայտեն: Ես ըմբռնումով եմ վերաբերվում դրան, չեմ համարում, որ իմ դեմ ինչ-որ բան է կատարվում: Մարդիկ պետք է խուզարկեն բոլոր այն տները, վերցնեն բոլոր այն էլեկտրոնային կրիչները, որոնք գոնե 1 տոկոսով կարող են օգտակար լինել իրենց գործին: Այնպես որ՝ չեմ լարվում»,-ասաց նա:
Դիտարկմանը, թե կա վարկած, որ ինքը իր պրոռեկտոր քեռու՝ Աշոտ Խաչատրյանի կողմից է ուղղորդվում, որովհետեւ վերջինս Պոլիտեխնիկում Թոքմաջյանի պաշտոնանկության մասին լուրեր տարածողներից մեկն է եւ մեծ ցանկություն ունի ռեկտոր դառնալու, տեղեկատվական և հեռահաղորդակցական տեխնոլոգիաների վարչության պետը պատասխանեց, որ իր համար նշանակություն չունի՝ ով է իր քեռին կամ հայրը, եւ դա չէր կարող իրեն կաշկանդել՝ գիշերով իր աշխատասենյակ մտնելու մասին ասուլիսում բարձրաձայնելուն:
Կարդացեք նաև
Իր կարծիքով, կապ կա՞ կարգապահական տույժերի ու սեքս-սկանդալի հետ:
«Չէ, չեմ կարծում, ուրիշ հարց է, որ կարգապահական նկատողությունների իրավական հիմնավորումների հետ համաձայն չեմ, ինչի առիթով դիմել եմ վարչական դատարան»,-ասաց Խոյեցյանը:
Իսկ ռեկտորի էջը կոտրելը եւ այնտեղից վարկաբեկիչ տեղեկատվություն տարածելը նա որակեց ստորության ամենացածր աստիճան:
Խոյեցյանը նաեւ նշեց, թե կասկածներ չունի՝ ով կարող է դա կատարած լինել:
Գոհար ՀԱԿՈԲՅԱՆ
