Արդեն երկու օր է` ճանապարհային ոստիկանության աշխատակիցները խիստ հսկողություն են սահմանել Գյումրու ամենակենտրոնական հատվածներում: Օրինակ` երեկ Երևանյան խճուղում մենք ականատես եղանք, թե ինչպես էին ճանապարհային ոստիկանության միանգամից մի քանի մեքենաներ շրջափակել խճուղին: Այսօր նույն պատկերը Գյումրու Շիրակացի փողոցում էր: Այնպիսի տպավորություն է, թե Գյումրիում արտակարգ դեպք է տեղի ունեցել, հետևաբար և քաղաքը շրջափակվել է ոստիկաններով:
Շիրակի մարզային ոստիկանությունից մեզ փոխանցեցին, որ ոչ մի արտառոց դեպք էլ տեղի չի ունեցել քաղաքում, պարզապես ՃՈ աշխատակիցները իրենց աշխատանքն են իրականացնում:
Իսկ վարորդներից ոմանք մեզ փոխանցեցին, որ ամեն ամսի վերջին օրերին նույն պատմությունն է, ոստիկանությունը բյուջե լցնելու խնդիր ունի…
Նկատենք, որ ճանապարհային ոստիկանության աշխատակիցները վատ չէին անի, եթե անձնական մեքենաներից բացի, մի քիչ էլ հսկողություն սահմանեին քաղաքային տրանսպորտին, հատկապես մեկը մյուսի հետ մրցակցության մեջ մտնող «Էքսպրես»
երթուղու միկրոավտոբուսների և 1-ին համարի ավտոբուսների վարորդներին: Վերջիններս, բացարձակապես հաշվի չառնելով, որ գործ ունեն մարդկային կյանքի հետ, հաճախակի են վազանց անում միմյանց, միայն թե տվյալ կանգառ ավելի շուտ հասնեն ու ավելի շատ ուղևորներ փոխադրեն:
Նունե ԱՐԵՎՇԱՏՅԱՆ
