Մայրության նպաստների մասին այսօր «Անալիտիկ» ակումբում կանանց իրավունքների կենտրոնի ներկայացուցիչ, իրավաբան Անաիդա Սիմոնյանն ասաց, որ «Ժամանակավոր անաշխատունակության նպաստների մասին» նախագիծը բազմաթիվ խնդրահարույց կետեր ունի: Մասնավորապես` աշխատանքային ստաժի սահմանափակումը` եթե կինը տվյալ գործատուի մոտ աշխատել է մինչեւ 1 տարի, ապա նրա դեկրետային նպաստը հաշվարկվելու է միջին աշխատավարձի 40 %-ի չափով, եթե` 1-3 տարի` 60%:
Իրավաբանի խոսքերով` սա հակասում է ՀՀ Սահմանադրության 32-րդ հոդվածին, ըստ որի յուրաքանչյուր քաղաքացի ունի աշխատանքի ազատ ընտրության իրավունք, իսկ նախագծի այդ կետով այս իրավունքը սահմանափակվում է ստաժի համար, ինչպես նշեց իրավաբանը, կինը չի կարողանալու մեկ այլ աշխատանք ընտրել:
Ինչպես նաեւ, խնդրահարույց է նախագծի այն դրույթը, ըստ որի բարձր աշխատավարձ ստացող հղիների համար վերին շեմ է սահմանվում. 1-2 երեխա ունենալու դեպքում առավելագույն շեմը կազմելու է 2 միլիոն 600 հազար դրամ, 3 եւ ավելիի դեպքում` 3 միլիոն 400 հազար: Բացի այս, նախատեսվում է նաեւ, որ դեկրետային գումարը հաշվարկվում է աշխատավարձի 100%-ի չափով, ինչը նվազեցվելու է 80%-ի:
Իրավաբանի խոսքերով` Ազգային ժողովում քննարկման ժամանակ, երբ հարց են բարձրացրել, թե ինչո՞ւ տղամարդկանց զորակոչելու դեպքում նրանց աշխատանքն ու աշխատավարձը պահպանվում է, պահումներ չեն անում, իսկ մայրերից կրճատումներ են անում. «Լուրջ չընդունեցին, ասացին` դե նրանք տղամարդ են, ընտանիք են պահում: Սա ակնհայտ խտրականություն է»:
Կարդացեք նաև
Մանրամասն` տեսանյութում
Իրավաբանը վստահեցրեց, որ պայքարելու են մինչեւ վերջ, որպեսզի այդ խնդրահարույց կետերը հանեն նախագծից, իսկ չաշխատող մայրերի համար էլ գտնեն գումարներ, որպեսզի նրանց եւս նպաստ տրվի:
Ասուլիսի մեկ այլ մասնակից, կանանց իրավունքների կենտրոնի ներկայացուցիչ Հայկուհի Ղազարյանն էլ ասաց, որ եթե նպաստը հաշվարկելիս հաշվի է առնվելու կնոջ աշխատանքային ստաժը, ապա կինը շահագրգռված չի լինի մայրանալ, կհետաձգի հղիանալը, որպեսզի ստաժ հավաքի ու գոնե աշխատավարձի 60%-ի չափով նպաստ ստանա, մոտ 3 տարի պիտի աշխատի, որ ստաժ ունենա: Հայկուհի Ղազարյանի խոսքերով` ստաժի պայման դնելով, նաեւ կբարձրանա մայրության շեմը:
Նելլի ԲԱԲԱՅԱՆ
