Հայաստանի համայնքների միության նախագահ Էմին Երիցյանը Հայաստանի իշխանությունների շահագրգռվածության պատճառը սահմանադրական փոփոխությունների հարցում պայմանավորում է Ռուսաստանի ազդեցությամբ:
Այսօր «Պոստ սկրիպտում» ակումբում նա ասաց, որ ցանկացած երկրում նախագահական ընտրությունները արտաքին գործոնի համար ռիսկային են: Հայաստանի դեպքում՝ Ռուսաստանի համար է ռիսկային: Ըստ նրա, եթե նախագահի թեկնածուներից մեկն էլ լինի հակառուսական տրամադրվածությամբ, շատ հնարավոր է, որ երկրում արտաքին քաղաքականությունը փոխի:
«Սահմանադրական բարեփոխումների քննարկումները կենտրոնացած են կառավարման համակարգը փոխելու թեմայով: Անցած տարվա նախագահական ընտրություններին նախագահի թեկնածուները բացի մեկից ունեին պրոռուսական կողմնորոշում, բայց մեկ թեկնածուն արեւմտյան կողմնորոշմամբ, կարող է իրավիճակ ու երկրի արտաքին քաղաքական կուրսը փոխել: Լուրջ մտավախություններ ունեմ, որ սահմանադրական փոփոխություններն ավելի շատ արտաքին գործոնի լոբբինգի արդյունք է, քան թե ներքին քաղաքական զարգացումների»:
Նա նաեւ պատահական չի համարում, որ սահմանադրական փոփոխությունների հանձնաժողովի ձեւավորման մասին Սերժ Սարգսյանի հրամանագիրը ստորագրվել է անցած տարվա սեպտեմբերի 4-ին՝ Մաքսային միությանն անդամակցելու մասին որոշումից մեկ օր հետո. «Իրականում սահմանադրական փոփոխությունները Հայաստանում պահանջված են, բայց քննարկումների մակարդակը, խորությունը հուշում են, որ դա երկիրը որոշակի արտաքին կողմնորոշման մեջ ստաբիլ պահելու մեխանիզմ ստեղծելու համար է»:
Արփինե ՍԻՄՈՆՅԱՆ
