«Հայկական կողմը մեկ խնդիր ուներ Փարիզում. օգոստոսի սկզբին տեղի ունեցած ռազմական հաջողությունը կապիտալիզացնել բանակցությունների սեղանին»,-այսօր «Փաստարկ» մամուլի ակումբում լրագրողների հետ հանդիպմանը, անդրադառնալով Փարիզում տեղի ունեցած՝ ՀՀ-ի, Ադրբեջանի և Ֆրանսիայի նախագահների եռակողմ հանդիպմանը, այսպիսի կարծիք հայտնեց քաղաքագետ Հրանտ Մելիք-Շահնազարյանը: Նա հանդիպումը դիտարկում է որպես օգոստոսյան լարված իրադարձություններին հետևած բանակցությունների շարունակություն:
Ըստ քաղաքագետի՝ հայկական կողմին հաջողվել է լուծել այդ խնդիրը: Այս առիթով Հրանտ Մելիք-Շահնազարյանը պարզաբանեց. «Զգացվում էր, որ Ալիևը որևէ նոր գործողություն չունի: Եթե նախկինում խաղաղ բանակցությունները շարունակելը, պատերազմ չվերսկսելու իրենց պատրաստակամությունը Ալիևի խաղաքարտերից էին, ապա հիմա այդ խաղաքարտերից նա զրկված է»: Հրանտ Մելիք-Շահնազարյանը դրական է համարում այն, որ կողմերը ևս մեկ անգամ վստահեցրին այն, որ ղարաբաղյան հակամարտության խաղաղ կարգավորման մեկ ձևաչափ կա՝ Մինսկի խմբի ձևաչափը:
Aravot.am-ի հարցին՝ կարելի՞ է, արդյոք, հաջողված համարել փարիզյան հանդիպումը՝ հատկապես հաշվի առնելով այն փաստը, որ հանդիպումից հետո անգամ որևէ համատեղ հայտարարություն չհնչեց, քաղաքագետը պատասխանեց. «Նման խնդիր չէր էլ դրվել ի սկզբանե: Ֆրանսիական կողմը զուտ հույս ուներ ցույց տալու իրենց միջնորդական առաքելությունը: Իսկ մենք հիմա փորձում ենք մեր ռազմական հաջողությունները առաջ տանել նաև բանակցությունների սեղանին: Պարզ է, որ Ադրբեջանի դիրքերը բավականին թուլացած են: Ադրբեջանն այսօր փորձում է ժամանակի ձգձգման միջոցով հարցադրումների փոփոխությունների հասնել, որ իրավաբանական ընկալումները մոռացության մատնվեն և բանակցային գործոն չլինեն:
Բայց հիմա խոսել այն մասին, որ ինչ-որ միասնական հայտարարություն կլինի, դեռ վաղ է, ընդհակառակը, դիրքերը բարելավելու խնդիր է դրված: Այս առումով հայկական կողմը դրական առաջընթաց ունի»:
Կարդացեք նաև
Հրանտ Մելիք-Շահնազարյանը նախագահների հանդիպման օրը եղել է Փարիզում և ներկա գտնվել այն միջադեպին, երբ նախագահները հանդիպումից հետո դուրս են եկել Ելիսեյան պալատից: Այդ ժամանակ հարց է հնչել, թե արդյոք Ֆրանսիայի նախագահը պահանջե՞լ է, որ Ադրբեջանում ազատ արձակվեն քաղբանտարկյալները: Զգացվել է հարցի հետ կապված Ալիևի շփոթվածությունը, որից հետո նա բառացիորեն վազքով նստել է մեքենա:
Ըստ Հրանտ Մելիք-Շահնազարյանի՝ ընդհանրապես այդ օրերին ֆրանսիական մամուլը ևս պարբերաբար անդրադարձել է Ադրբեջանում գոյություն ունեցող ներքին խնդիրներին՝ հատկապես քաղբանտարկյալների հարցերին:
Տաթև ՀԱՐՈՒԹՅՈՒՆՅԱՆ
