Դիլիջան քաղաքի «Դիլիջան Ռեզորտ» հյուրանոցում օրերս տեղի ունեցավ եռօրյա սեմինար՝ «Քրեական օրենսդրության եւ դատավարության ոլորտում Մարդու իրավունքների եվրոպական կոնվենցիայի 2-րդ, 3-րդ, 5-րդ, 6-րդ եւ 8-րդ հոդվածների վերաբերյալ հմտությունների կատարելագործմանը» թեմայով: Սեմինարը կազմակերպել էր Եվրոպայի խորհուրդը՝ «Մարդու իրավունքների եվրոպական կոնվենցիայի եւ Մարդու իրավունքների եվրոպական դատարանի նախադեպային իրավունքի կիրառման ամրապնդումը Հայաստանում» ծրագրի շրջանակներում: Մասնակցում էին ՀՀ վճռաբեկ դատարանի քրեական պալատի դատավորները եւ դատական ծառայողները:
Այս միջոցառումը սեպտեմբերի 11-13-ին ՀՀ վճռաբեկ դատարանի քաղաքացիական եւ վարչական պալատի դատավորների եւ դատական ծառայողների համար կազմակերպված Քաղաքացիական ու վարչական օրենսդրության եւ դատավարության ոլորտում հմտությունների կատարելագործմանը նվիրված առաջին եռօրյա վերապատրաստման շարունակությունն էր:
Սեմինարը վարում էին Եվրախորհրդի փորձագետներ Դանուտե Ջոսիենեն, Մատիաս Հեյհնելը, Ջերեմի Մաքբրայթը, տեղացի փորձագետներից Արա Ղազարյանը եւ Մարդու իրավունքների եվրոպական դատարանի նախկին դատավոր, այժմ՝ ՀՀ սահմանադրական դատարանի անդամ Ալվինա Գյուլումյանը:
Սեմինարի հիմնական նպատակն էր ՄԻԵԿ իրավազորության շրջանակների ուսումնասիրությունը, ներպետական բարձր ատյանների դատարանների դերակատարումն ազգային մակարդակով մարդու իրավունքների պաշտպանության հարցում: Հատուկ ուշադրության արժանացան ՄԻԵԿ 2-րդ, 3-րդ, 5-րդ, 6-րդ եւ 8-րդ հոդվածները, քրեական դատավարության հարցերը եւ առավել համապատասխան ՄԻԵԴ նախադեպերը, այդ թվում՝ նաեւ 5-րդ հոդվածի համաձայն՝ անձին ազատության իրավունքից զրկելու հետ կապված դատական հսկողության միջոցների կիրարկումը, 6-րդ հոդվածով նախատեսված երաշխիքները եւ 8-րդ հոդվածով նախատեսված գաղտնի փաստաթղթերի՝ որպես ապացույցի, ներկայացումը:
Սեմինարը մասնակիցներին հնարավորություն ընձեռեց համեմատելու մարդու իրավունքների պաշտպանության ոլորտում Եվրախորհրդի անդամ պետությունների ներպետական դատարանների լավագույն գործելակերպի օրինակները:
Կարեւոր էր Եվրախորհրդի փորձագետ Ջերեմի Մաքբրայդի ներկայությունը, քանի որ վերջինս բազմաթիվ գրքերի հեղինակ է, որոնցով այսօր առաջնորդվում են պրակտիկ իրավաբաններն ու դատավորները:
Կարդացեք նաև
Հետաքրքրական էր Մարդու իրավունքների եվրոպական դատարանի նախկին դատավոր, այժմ՝ Լիտվայի սահմանադրական դատարանի անդամ Դանուտե Ջոսիենեի մասնակցությունը, ով քաջատեղյակ էր Հայաստանի Հանրապետության դեմ քննված գործերի քանակից եւ արդյունքներից:
Ամփոփելով՝ նշենք, որ սեմինարը կրում էր ուսուցողական բնույթ եւ կարծես թե համերաշխում էր մասնակից կողմերին:
ԱՄԱԼՅԱ ՀԱՐՈՒԹՅՈՒՆՅԱՆ
«Առավոտ» օրաթերթ
28.10.2014
