«Ես այդպիսի մանր հարցերով չեմ հետաքրքրվում և չեմ զբաղվում»,-հարցին՝ Հայաստանի՝ Եվրասիական տնտեսական միությանն (ԵՏՄ) անդամակցությունից հետո ի՞նչ որոշում է կայացվելու ՀՀ-ԼՂՀ սահմանին տեղադրվելիք մաքսակետի վերաբերյալ ու հնարավոր է այն չթողնվի՞ սահմանապահների հայեցողությանը, ինչպես ռուսական կողմից են նշել, այսպես պատասխանեց մոսկվայաբնակ հայ քաղաքագետ, «Ժողովրդավարության եւ համագործակցության ինստիտուտի» Նյու-Յորքյան ներկայացուցչության ղեկավար Անդրանիկ Միհրանյանը:
Նա ևս մեկ անգամ նշեց, որ այն կարծիքին է, թե «Եվրասիական ինտեգրացիոն նախագծերում որոշողը մեկ մարդ է. ՌԴ նախագահ Վլադիմիր Պուտինը» ու մանրամասնեց. «Ես ինչ ասել եմ իրականություն էր, մարդն արեց այն, ինչ անհրաժեշտ էր, որ ՀՀ-ն դառնա ԵՏՄ անդամ և լինի լիիրավ անդամ: Ինչ վերաբերում է մաքսային հարցերին, ապա սրանք տեխնիկական են, որոնք պետք է լուծվեն գործակցության արանքում կամ արդյունքում: Ես չեմ տեսնում որևէ խոչընդոտ կամ լուրջ դժգոհություն»:
Aravot.am-ի հարցին, արդյոք պատճառն այն չէ՞, որ հայկական կողմից համարժեք արձագանք չհնչեց Կիսելյովի, Վոլինկինի վարքագծին, այդ պատճառով այժմ ՌԴ նախկին պաշտոնյաները սկսել են խոսել այն մասին, որ եթե հայերը չընտրեն ԵՏՄ-ն, ապա հարցականի տակ կհայտնվի հայկական պետականությունը, պարոն Միհրանյանը վրդովվեց. «Ինձ թվում է, որ ՀՀ-ում շատ մարդիկ գտնվում են ցնորական վիճակում և իրենք իրենց գլխում ստեղծում են ինչ-որ հայտարարություններ և պայքարում դրանց դեմ: Լավ ճանաչում եմ Կիսելյովին, եթե որևէ մեկը նրա հայտարարության մեջ կարող է գտնել որևէ վիրավորական վերաբերմունք, ապա այդ մարդը պետք է գնա բժշկի: Եթե որևէ մեկն ասում է, որ լավ կլինի, որ ՌԴ-ի հետ մեծ ներդաշնակության մեջ մտնող հանրապետությունում ռուսերենը ավելի լավ տարածված լինի, ես այդտեղ բարի ցանկություն եմ տեսնում: Դրա ի՞նչն է վիրավորական, ես էլ ուրախ կլինեի, որ հայերը բոլորը խոսեին արաբերեն, ֆրանսերեն անգլերեն, չինարեն: Միայն թույլ, բարդույթավորված մարդն է այդպիսի հայտարարությունները օգտագործում հիմար-հիմար ենթադրությունների գալու համար»:
Կարդացեք նաև
Տաթև ՀԱՐՈՒԹՅՈՒՆՅԱՆ
