«Ամեն անգամ, երբ ընդդիմությունը պայքարի դրոշներ է բարձրացնում, ես ասում եմ ռեսուրսների գնահատում կատարենք»,- այսօր` հոկտեմբերի 28-ին, «Հայացք» մամլո ակումբում լրագրողների հետ հանդիպման ընթացքում նշեց Վերելք քաղաքական ուսումնասիրությունների հիմնադրամի նախագահ Արծրուն Պեպանյանը:
Նա նշեց, որ իշխանությունը ունի ոստիկանություն, պաշտոնյաներ, ազգային անվտանգության ներկայացուցիչներ, բանակ, զենք. «Իսկ ի՞նչ ունի ընդդիմությունը, գրե’ք ի՞նչ ունի ընդդիմությունը եւ դրե’ք կշեռքի վրա: Պարզապես գնում են անզեն, անկազմակերպ ու դիմացն այս զորաբանակն է, եւ քանի տոկոս է հաղթելու հավանականությունը: Երկրորդ Մարտի 1-ն էլ կլինի, երրորդն էլ, չորրորդն էլ, ինչի՞ չպետք է լինի, հո, հիմար չե՞ն, որ իշխանություն տան»:
Նա համարում է, որ հասարակությունը պետք է այնպես զարգացած լինի, որ ունենա նորմալ դատական համակարգ եւ այնտեղ էլ կարողանա բողոքել նախագահի կատարած անօրենություններից. «Ամբողջ պետությունն այսօր մեկ անձ է, եւ այդ անձի շնորհքը չէ, դա մեր անշնորհքությունն է: Առաջ ուրիշ անուն ազգանուն ուներ, հիմա ուրիշ անուն ազգանուն ունի: Մի քանի ձեւ ունեն` կա’մ պետք է կարողանան այնքան ուժ հավաքել, որ իշխանությանը սրբի, որը քիչ հավանական է, կա’մ էլ հաշվի առնելով ազգի բարոյական հատկանիշները, իշխանության ներսում էլ պետք է նայել»:
Ամի ՉԻՉԱԿՅԱՆ
