«99 տոկոսով պահպանվում է կարգը, եւ լրագրողները կրում են հավատարմագիրը»,- այսօր` հոկտեմբերի 28-ին, «Մեդիա կենտրոնում» լրագրողների հետ հանդիպման ընթացքում հայտարարեց ԱԺ հասարակայնության եւ տեղեկատվության միջոցների հետ կապերի վարչության պետ Արսեն Բաբայանը:
Նա նշեց, որ Ազգային ժողովում հավատարմագրված լրագրողները շենքում կարող են հարցեր տալ, նկարահանումներ կատարել: Այդ իսկ պատճառով պատգամավորը կամ ԱԺ աշխատակիցը պետք է իմանան, որ իրենց հարց տվողը լրագրող է, այլ ոչ թե քաղաքացի. «Մենք ոչ միայն Ազգային ժողովում, այլեւ շենքից դուրս ունենք դեպքեր, երբ պետական պաշտոնյան չի իմացել, որ գործ ունի լրագրողի հետ: Չնայած նման կարգ չկա, բայց ցանկալի է, որ լրագրողները կրեն իրենց վկայականները, որովհետեւ դրսում ներկայանալն էլ բավական է, բայց այդ դեպքում ապացուցման խնդիր է առաջանում»:
Նա, անդրադառնալով Քրեական օրենսգրքում նախատեսված լրագրողի աշխատանքին խոչընդոտելու հոդվածին, հայտարարեց, որ չի կարող պատկերացնել, ինչպես կարելի է մեղադրանք առաջադրել մի անձի, որը չի պատկերացրել, որ գործ է ունենում լրագրողի հետ:
Հարցին, թե վարչությունը պատրաստվո՞ւմ է պարտականությունների մասին հուշող թերթիկներ ամրացնել պատգամավորների համար, Արսեն Բաբայանը պատասխանեց, որ ԱԺ հասարակայնության եւ տեղեկատվության միջոցների հետ կապերի վարչությունը նման բան անելու որեւէ լիազորություն չունի, եւ պատգամավորները գիտեն իրենց պարտականություններն ու իրավունքները. «Լրագրողներն էլ լավ գիտեն իրենց իրավունքները: Երբ ես անձամբ մոտենում էի որոշ լրագրողների եւ խնդրում էի` կարգի համաձայն փակցնեն այդ հավատարմագիրը, լրագրողներից մի քանիսը ասացին`իսկ ավելի ճիշտ չի՞ լինի, որ դրա մասին հուշող թերթիկներ լինեն, ինչը իմ կողմից ընդունվեց: Ամբողջ աշխարհում նորմալ, քաղաքակիրթ է այդպիսի հայտարարությունները փակցնելը, ինչպես եւ մենք համոզվեցինք` հավատարմագրված լրագրողների 80-90 տոկոսը պարզապես ծանոթ չէր հավատարմագրման կարգին եւ չգիտեին, որ նման բան կա»:
Կարդացեք նաև
Ամի ՉԻՉԱԿՅԱՆ
