Գյումրեցի 7-ամյա Աիդա Ալեքսանյանի ընտանիքը բնակվում է Եսայան 213/006 ա հասցեի տնակում` թշվառ պայմաններում, խոնավության մեջ: Տնակը ոչ միշտ է հաջողվում ջեռուցել: Տան գրեթե բոլոր անդամները` հայրը, պապիկը, տատիկը, փոքր եղբայրը տառապում են տարբեր ծանր հիվանդություններով: Սակայն ընտանիքի անդամների միակ մտածմունքը փոքր Աիդայի կյանքը փրկելն է. բանն այն է, որ փոքրիկի մոտ հայտնաբերվել է սրտի բնական արատ. աորտային կոարկտացիա:
Այս տարվա փետրվարին Նորք -Մարաշ բժշկական կենտրոնում վիրահատել են նրա սիրտը, բժշկական փաստաթղթերից մեկում ընթերցում ենք . «Կատարվել է կոարկտացիայի հատվածի հատում և անոթակցում ծայրը ծայրին, ապա պլաստիկա տավարի պերիկարդիլաթով»:Իսկ բժշկական փաստաթղթերը անթիվ են: Ծնողների ասելով, նրա վիճակը թեև մի փոքր լավացել է, սակայն բժիշկները տեղեկացրել են` հնարավոր է նրան 2-րդ, 3-րդ անգամ վիրահատեն, ընդհուպ մինչև սրտի բաց վիրահատության ենթարկեն: Օգոստոսին նոր միայն պարզ կդառնա, թե երբ կնշանակեն երկրորդ վիրահատությունը: Վիրահատությունից հետո էլ 7-ամյա աղջկա արյան ճնշումը բարձրանում է, հասնում է 120-ի, ուժեղ գլխացավեր ունի, նրա մոտ անհանգիստ վիճակ է:
Կարդացեք նաև
Աիդայի մայրը` Անժելա Ալեքսանյանը, մեզ հետ զրույցում ասաց, որ աղջկան տարել են էնդոկրինոլոգի մոտ, որը նշանակել է մակերիկամի յամեր , նրան նշանակել են նաև գլխուղեղի հիպոֆիզ, սակայն Երևանում հրաժարվում են նրան հետազոտել:
«Անցած տարի պետպատվերի թղթով գնացել ենք «Նաիրի» բժշկական կենտրոն, սակայն հետ են դարձրել, թե պետպատվեր չունենք, մինչև օրս բոլորը հրաժարվում են երեխային յամեր անցկացնել: Իսկ մեր ֆինանսական միջոցներն այլևս չեն ներում, երեխային ամեն անգամ Երևան տեղափոխելուց, հետազոտման ենթարկելուց էնքան գումարներ պարտք արեցինք, վարկով վերցրեցինք, որ հիմա բավական դժվար կացության մեջ ենք հայտնվել: 85 հազար դրամ է պահանջվում յամեր մտցնելու համար, սակայն չենք կարողանում ճարել էդ փողը: Շիրակի մարզպետարանից ամեն անգամ փորձում են մեզ օգնել այս հարցով, սակայն, երբ նրանք մեր ներկայությամբ մայրաքաղաք են զանգահարում, ամեն անգամ Երևանից շեշտում են, որ պետպատվերի տակ այդ հետազոտությունը չկա, պիտի հերթագրվեք ու սպասեք, բայց մինչև ե՞րբ սպասենք, երեխայի վիճակը վատանում է …», ասում է մայրը:
Ընտանիքը սննկացել, պարտքերի մեջ է թաղվել աղջկան բուժումների տանելու պատճառով. սկզբում բոլոր հետազոտություններն ու դեղերը եղել են վճարովի, Գյումրիում անգամ բժիշկները գլուխ չեն հանել, թե ինչով է տառապում փոքրիկ Աիդան: Աղջկա բուժման ընթացքում ծանր ֆիզիկական աշխատանք կատարելիս, հայրը ևս վատացել, արյունահոսել է ու ծանր վիրահատություն տարել : Հոր ասելով, տան միակ կերակրողը ինքն է, բայց մշտական աշխատանք չունի, ինչ պատահի, այն էլ անում է` փայտ կտրել, անասուններին արածացնելու տանել, շինարարություն և այլն…
Մայրը թեև մասնագիտություն ունի, բուժքույր է, նաև վարսահարդար է, սակայն ամբողջ օրը զբաղված է երեխային հիվանդանոց տանելով, դեղորայք ձեռք բերելով: Երեխայի աչքերը ևս նորմալ վիճակում չեն, նրա մոտ կարճատեսություն է առաջացել, նյարդերը ևս թուլացել են, հիշողության կորուստ ունի: Ընտանիքը, սակայն, այնքան հպարտ է, որ իրենց սարսափելի վիճակի մասին ամաչում են բարձրաձայնել: Ծնողների ասելով, Աիդայի վիճակը այնքան մտահոգող է, որ հերթ չի հասնում տան մյուս հիվանդների բուժմանը: 5 տարեկան եղբայրը` Արամ Ալեքսանյանը, տառապում է 4-րդ աստիճանի խրոնիկ տոնսիլիտով, քթի միջնապատ ծռված է, չի կարող շնչել, նաև տառապում է հարթաթաթությամբ: «Վատն էն է, որ թե՛ տնակի ցուրտը, և թե՛ ծուխը հակացուցված են երեխաներին»,- մղկտում էին ծնողները:
Վերջիններիս տխուր տրամադրություն փոխվում է միայն Աիդայի նկարների ու թիվ 15 դպրոցի ուսուցիչների և տնօրենի մասին խոսելիս: Ըստ նրանց, դպրոցում այնքան բարեհոգի են, որ տեսնելով Աիդայի օր օրի վատթարացող առողջական վիճակը, դասերից հետ մնալը . եղել են օրեր, երբ երեխայի արյան ճնշումը հասել է 180-ի ու չի կարողացել դասի գնա, դասերից հետո նրա հետ լրացուցիչ պարապում են:
Մանրամասները` տեսանյութում
Նունե ԱՐԵՎՇԱՏՅԱՆ
