«Եթե փորձենք զուտ մեխանիկորեն գնահատական տալ, ապա այո, կոնկրետ իրականացնողները պատժված են»,-Aravot.am-ի հարցին` 15 տարի անց ինչպիսի՞ն է իրավիճակը, հոկտեմբերի 27-ին կատարվածի մեղավորները պատժվա՞ծ են, այսպիսի կարծիք հայտնեց ԲՀԿ խմբակցության պատգամավոր Միքայել Մելքումյանը:
Նա հավելեց, թե 15 տարի է անցել, և համակարգային քաղաքական շարժառիթները, որոնց արդյունքում տեղի ունեցավ հոկտեմբերի 27-ը, վերաարժևորման կարիք ունեն: ԲՀԿ-ականը հավելեց. «Ես էլ այն կարծիքի չեմ, որ կոնկրետ տեխնիկական ֆիզիկական ոչնչացման խնդիր էր դրված: Կարծում եմ, որ սա ունի քաղաքական ենթատեքստ»:
Մեր դիտարկմանը, թե պատգամավորը նկատի ունի այն, որ կոնկրետ քաղաքական հրահանգ տվողներն ու պատվիրատուները պատժված չե՞ն, պարոն Մելքումյանն արձագանքեց. «Ես չեմ պնդում, որ դա այսպես է, բայց կարելի է դա ենթադրել»:
Մեր մյուս հարցին, եթե հոկտեմբերի 27-ի մեղավորները պատժված լինեին, գուցե մարտի 1 տեղի չունենա՞ր, պարոն Մելքումյանն այսպես պատասխանեց. «Մենք պետք է նաև առաջ նայենք, համաձայն եմ, որ մարտի 1-եր այս երկրին պետք չեն, ցանկացած մարդու կյանք թանկ է ամեն ինչից: Մենք պետք է փորձենք առաջ նայել և սխալները ճիշտ գնահատել: Տեղեր կան, որ դու պետք է ճիշտ նահանջես, ավելի կտրուկ լինես: Այսօր մեր պետության իրավիճակը թելադրում է ոչ ստանդարտ լուծումներ»:
Տաթև ՀԱՐՈՒԹՅՈՒՆՅԱՆ
