«Ոչ շների սպանդին» նախաձեռնության անդամներն այսօր Երևանի քաղաքապետարանի շենքի առջև բողոքի ակցիա էին կազմակերպել: Ակցիայի մասնակիցներն իրենց դժգոհությունն էին հայտնում շների սպանդի առնչությամբ: Նրանք պնդում էին, որ օրերս բնակիչներից բազմաթիվ ահազանգեր են ստացվում Երևանի փողոցներում թափառող շների սպանդի վերաբերյալ:
Ինչպես Aravot.am-ի հետ զրույցում նշեց «Փրկենք կենդանիներին» բարեգործական հասարակական կազմակերպության նախագահ Նունե Մեհրաբյանը, թեև պետբյուջեից տարեկան 220 մլն դրամ է դուրս գրվում փողոցային շներին ստերիլիզացնելու նպատակով, սակայն Երևանի փողոցներում չեն դադարում շներին սպանդի ենթարկելու դեպքերը :
«Արդեն 8 տարի է՝ քաղաքապետարանը ասում է, որ հարցը կլուծի, սակայն իրականում ոչ մի աշխատանք չի իրականացվում»,-ասաց Մեհրաբյանը՝ հավելելով, որ իրենք բազմիցս գրավոր դիմել են Երեւանի քաղաքապետարան:
Կազմակերպությանը պատասխանել են՝ Երեւան քաղաքում կենդանիների զանգվածային սպանդ չի կազմակերպվում:
Կարդացեք նաև
Ներկա գտնվող քաղաքացիներից մեկի հավաստմամբ՝ թափառող շների զանգվածային սպանդը կբերի տեսակի ագրեսիվացման և թվաքանակի ավելացման. «Ինչպե՞ս կարելի է Երևանի կենտրոնում իրականացնել սպանդ: Ոչ մի երկրում նման բան չի կատարվում: Կառավարությունը հարցը պետք է լուծի ոչ թե տեսակը ոչնչացնելով, այլ ավելի մարդասիրական մեթոդներով, ինչպես արվում է բոլոր քաղաքակիրթ երկրներում»,- ասում է խնդրով մտահոգված քաղաքացին:
Նախաձեռնության անդամ Անի Նավասարդյանն էլ հավելեց, որ այսօր շների բազմացման ամենամեծ ու կարևոր խնդիրը աղբահանությունն է։ «Աղբահանության ծրագրի կարգավորմանը զուգահեռ՝ կլուծվի նաեւ թափառող կենդանիների խնդիրը»:
Ակցիայի մասնակիցները նշեցին նաեւ, որ իրենք ստորագրահավաք են կազմակերպել ՝ հուսալով, որ այս անգամ գոնե իրենց պահանջը անարձագանք չի մնա:
Պերճուհի ԳԵՎՈՐԳՅԱՆ
