«Փող ունեցող մարդը գնալու, այնտեղ դնելու է իր բիզնեսը ո՞վ էլ չունի, այնտեղ գնալու է աշխատի»,-այսօր «Պոստ սկրիպտում» մամուլի ակումբում լրագրողների հետ հանդիպմանը հայտարարեց ԱԺ ՀՀԿ խմբակցության պատգամավոր Վարդան Այվազյանը:
Պարոն Այվազյանն ամեն կերպ փորձում էր արդարացնել սահմանամերձ համայնքներին հարկային արտոնություններ տալու մասին օրինագիծը, որը բազմաթիվ քննադատությունների արժանացավ: Նա նշեց, թե սա նաև խթան է, որ տնտեսական ակտիվությունը բարձրանա: Այնուհետև պարոն Այվազյանը որպես համեմատություն բերեց Լաս Վեգասի օրինակը. «Աշխարհքում ո՞նց են զարգացել: Բոլորը խոսում են Լաս Վեգասի հրաշքի մասին, ի՞նչ է կարծում եք անապատներ էին, մեկն անցավ այդտեղո՞վ…. Իրականում այստեղ եղել է հարկերից ազատում, Չինաստանում ևս զոնաներ ունեն, որ ազատել են հարկերից, ստեղծել են ազատ տնտեսական գոտի»:
Պարոն Այվազյանն ասաց, թե եթե փող ունենար և ցանկանար բիզնես դնել, կգնար սահմանամերձ գոտիներ և կօգտվեր հարկային արտոնություններից: Այս առիթով նա հավելեց. «Ո՞նց եք մտածում, որ Դիլիջանում բիզնես ունեցողը չի՞ գնա Կողբ գյուղում կամ Ճամբարակում բիզնես դնի»:
Հարցին՝ առաջնայինը ՀՀ-ում հարկերի ազատումով գոտի ունենա՞լն է, թե՞ սահմանամերձ գոտիները զարգացնելը, պարոն Այվազյանը պատասխանեց. «Երբ ասում ես ազատ տնտեսական գոտի, ուզում ես, որ այստեղ խնդիր չունենաս հարկերի հետ կապված, բայց երբ այս գոտուց դուրս եկար, պետք է տաս հարկերը: Դրա համար էլ ասում ենք, այդտեղ թող ավելի շատ եկամուտ ստանան, քանի որ ավելի բարդ պայմաններում են աշխատում»:
Կարդացեք նաև
Հարցին՝ ինչո՞վ էր զիջում ԱԺ ՀԱԿ խմբակցության պատգամավոր Նիկոլ Փաշինյանի ներկայացրած նախագիծը, համաձայն որի՝ առաջարկվում էր սուբսիդավորել այդ տարածքներում ապրող անձանց կոմունալ վճարները, պարոն Այվազյանը պատասխանեց. «Ես մտածում եմ, որ «ա»-ն ու «բ»-ն իրար չեն խանգարում: Բայց վճարների հետ կապված խնդիրն այստեղ այն է, թե ու՞մ հաշվին պիտի կատարվի դա, կամ արդյոք դա՞ է լավագույն միջոցը: Մարդ կա, որ խնդիր չունի էլեկտրաէներգիայի վճարի հետ հետ կապված, հաշվառում պիտի արվի, ինչքան պիտի փոխհատուցվեն»:
Տաթև ՀԱՐՈՒԹՅՈՒՆՅԱՆ
