«Բացարձակապես անձնական խնդիր չկա: Դա չի նշանակում, որ եթե ես ընդդիմության կամ դիմության ներկայացուցիչ եմ, ես տղամարդ կամ մարդ չեմ: Որևէ մեկին իրավունք չի տրված մյուսին վիրավորել»,-Aravot.am-ի հարցին՝ Նիկոլ Փաշինյանի հետ անձնական խնդիրնե՞ր ունեն, որ ԱԺ-ում սահմանամերձ գոտիներում հարկային արտոնություններ տրամադրելու նախագծի շուրջ քննարկումների ժամանակ անցան փոխադարձ վիրավորանքների դաշտ, այսպես պատասխանեց ԱԺ ՀՀԿ խմբակցության պատգամավոր Վարդան Այվազյանը:
Լրագրողներից մեկը միջամտեց, թե այդ ինքն էր վիրավորում Զարուհի Փոստանջյանին, ոչ թե իրեն են վիրավորել: Պարոն Այվազյանը բորբոքվեց ու լրագրողի հետ լեզվակռվի մեջ մտավ. «Հիմա որ քեզ էլ ասեմ, ինձի կասես. ուշադիր նայեք ու կտեսնեք, որ Զարուհի Փոստանջյանը մեր խոսակցության մեջ մտավ ու կարծեց, թե կարող է միջամտել ու ինձ բան ասել: Ձեզ ձեռ է տալիս, որ դուք հակառակը գրեք»:
Լրագրողն ասաց, թե ուզում է, որ Վարդան Այվազյանն արդարանա, պատգամավորն էլ ավելի բորբոքվեց. «Ես ինքս հայ տղամարդ եմ, ինձ բացարձակ քաղաքական որևէ խնդիր չի հուզում, երբ հարցը վերաբերում է մարդկային արժանապատվությանը: Աղջիկս կլինի, թե կինս, երբ երկու տղամարդ խոսում են, ես ասում եմ չմիջամտես, այդքան դաստիարակված եմ: Ձեզ էլ խնդրում եմ մենակ ճիշտ մեկնաբանել: Կան արժեքներ, որ պետք է չկոտրեն, անկախ նրանից ազատ եք, թե ոչ»:
Կարդացեք նաև
Տաթև ՀԱՐՈՒԹՅՈՒՆՅԱՆ
