Իվան Վոլինկինի խոսքերով՝ ԵՏՄ-ին անդամակցությունը չի նշանակում, որ Հայաստանը չի կարող համագործակցել այլ պետությունների հետ:
«Կարծում եմ՝ անդամակցելով Եվրասիական տնտեսական միությանը՝ Հայաստանը շատ ճիշտ ռազմավարական քայլ է կատարել»,- լրագրողների հետ զրույցում նշեց Հայաստանում Ռուսաստանի արտակարգ եւ լիազոր դեսպան Իվան Վոլինկինը:
Նա նշեց, որ ԵՏՄ-ին անդամակցությունը չի նշանակում, որ Հայաստանը չի կարող համագործակցել այլ պետությունների հետ. «Ռուսաստանն իր հարաբերություններն ունի Եվրամիության հետ: Դա շատ նորմալ է, երբ պետությունը բազմակողմանի հարաբերություններ է զարգացնում: Գլխավորն այն է, որ դա ի վնաս չլինի»
Անդրադառնալով երեկ տեղի ունեցած ԱԺ ոչ իշխանական ուժերի հանրահավաքին՝ նա նկատեց, որ եռյակի գրեթե բոլոր անդամները կողմ են Հայաստանի՝ ԵՏՄ անդամակցությանը. «Գրեթե ոչ ոք դեմ չի արտահայտվում, բացի մեկից»:
Կարդացեք նաև
Իսկ հարցին, թե դեսպանը ինչպե՞ս է գնահատում Լեւոն Տեր-Պետրոսյանի ելույթը, Իվան Վոլինկինը պատասխանեց. «Ես Լեւոն Տեր-Պետրոսյանի ելույթին գնահատականներ չեմ տա, բայց նրա ելույթի զգալի մասը նվիրված էր Եվրասիական տնտեսական միությանը»:
Ամի ՉԻՉԱԿՅԱՆ
