Դպրոցի զարգացման ծրագրի կառուցվածքի համապարփակ սխեմա գոյություն չունի: Յուրաքանչյուր դպրոց կարող է ցուցաբերել ինքնուրույն մոտեցում:
Եվ ահա ԱԺ պատգամավոր, «Դպրոց-կենտրոնների միություն» իրավաբանական անձանց միության նախագահ Ռուզաննա Մուրադյանին այնքան էլ չեն գոհացնում դպրոցների տնօրենների կազմած զարգացման ծրագրերը, քանի որ, նրա խոսքով, դրանք չունեն հստակ ուղղվածություն ու մեթոդաբանություն:
Այս ամենը հաշվի առնելով՝ «Կրթության որակ և համապատասխանություն» երկրորդ վարկային ծրագրի ֆինանսական միջոցներով՝ «Աջակցություն «Դպրոց-կենտրոնների միություն» իրավաբանական անձանց միությանը» ենթածրագրի շրջանակներում հրատարակվել են «Դպրոցի զարգացման ծրագիր» և «Ուսուցչի էթիկայի նորմեր» մեթոդական ձեռնարկները, որոնց շնորհանդեսը տեղի ունեցավ այսօր՝ Թեքեյան կենտրոնում:
«Դպրոցի զարգացման ծրագիր» ձեռնարկի հեղինակները հինգն են՝ Ռուզաննա Մուրադյան, Գագիկ Մելիքյան, Արմեն Հովսեփյան, Կարեն Մելքոնյան, Արտաշես Թորոսյան և Գայանե Սաֆարյան:
Կարդացեք նաև
ԱԺ պատգամավոր, հեղինակային խմբի անդամ Ռուզաննա Մուրադյանը լրագրողների հետ զրույցում ասաց, որ «Դպրոց-կենտրոնների միությունը» մի հարթակ է, որտեղ վեր են հանվում հանրակրթության խնդիրները և հնարավորություններ ստեղծվում դրանց լուծում տալու համար: Նրա խոսքով՝ դպրոցի զարգացման այս մեթոդական ձեռնարկի մշակումն ու տպագրությունը այդ խնդիրներից մեկի լուծմանն ուղղված քայլ է. «Տարբեր երկրների փորձն ուսումնասիրելով և ի մի բերելով՝ փորձել ենք պատրաստել այս ձեռնարկը և ծառայեցնել դպրոցի գործուն զարգացմանը, որովհետև մի բան է, որ ծրագիրը գրում ես թղթի վրա, մնում է, մեկ այլ բան է, երբ ծրագրի յուրաքանչյուր կետը դնում ես գործողության մեջ»,- ասաց Ռ. Մուրադյանը՝ ընդգծելով, որ ձեռնարկը մեթոդական կրթական ռեսուրս է դպրոցների տնօրենների, դպրոցական խորհուրդների համար, որովհետև դրանում հստակ մատնանշվում են, թե դպրոցի զարգացման ծրագիրն ինչ բաժիններ պիտի ունենա, ինչ հարցերի պիտի պատասխանի, ինչ ոլորտներ ներառի և այլն. «Ձեռնարկն ավելի շատ մեթոդական բնույթ ունի, այսինքն՝ ոչ միայն ինչեր-ն է մատնանշում, այլև ինչպես-ները՝ կոնկրետ օրինակներով ցույց տալով, թե ինչպես է պետք այդ ամենն անել: Կարծում եմ, այս ձեռնարկը կհեշտացնի դպրոցների տնօրենների գործը՝ հետագայում զարգացման ծրագրեր կազմելիս կամ արդեն եղածները վերանայելիս»,- ասաց Ռ. Մուրադյանը:
ՀՀ կրթության և գիտության նախարարության Հանրակրթության վարչության պետ Նարինե Հովհաննիսյանն էլ լրագրողների հետ զրույցում հատկապես կարևորեց Սարիբեկ Հակոբյանի, Անահիտ Զոհրաբյանի և Սիլվա Պետրոսյանի մշակած «Ուսուցչի էթիկայի նորմեր» ձեռնարկի տպագրությունը. «Մենք բավականին լուրջ խնդիրներ ունենք ուսուցիչ-աշակերտ հարաբերությունների հետ կապված: Բոլորիս հայտնի են դեպքեր, որոնցում կարևորվում է ուսուցչի էթիկայի նորմերի պահպանումը: Եվ այսօր այս ուղեցույցը գալիս է կարևորելու այդ խնդիրն ու օգնելու, որ դպրոցի ներսում ուսուցիչն իմանա իր իրավունքները և հստակ պատկերացնի իր պատասխանատվության չափը: Այլ խոսքով ասած՝ մենք ուզում ենք ուսուցչին տեսնել այնպիսին, ինչպիսին նա պիտի լինի»,- ասաց Ն. Հովհաննիսյանը:
Սիրանուշ ՀԱՅՐԱՊԵՏՅԱՆ
