Արդարադատության նախարարության Քրեակատարողական հիմնարկների վարչության պաշտոնական կայքէջը՝ www.ced.am-ը, ներկայացրել է «Աջակցություն դատապարտյալին» հիմնադրամի գործունեությունը:
Համաձայն www.ced.am-ի, 2001թ. սեպտեմբերի 22-ին ՀՀ կառավարության թիվ 888 որոշմամբ ստեղծվել է «Աջակցություն դատապարտյալին» հիմնադրամը: Գործունեությունն սկսել է ծավալել 2002թ. ապրիլի 1-ից:
«Աջակցություն դատապարտյալին» հիմնադրամի առաջնային նպատակներից է եղել դատապարտյալներին աշխատանքով ապահովումը, ինչպես նաեւ նրանց կրթական մակարդակի բարձրացումը:
«Անհրաժեշտ է նշել, որ ցանկացած ոլորտում, որով զբաղվում է հիմնադրամը, ներգրավված են դատապարտյալներ, իսկ ոլորտները բազմաբնույթ են»,- ասված է ամփոփ ներկայացված տեղեկանքում:
Կարդացեք նաև
Ծանրակշիռ տեղ է զբաղեցնում սննդարդյունաբերությունը:
Օրինակ, հացի եւ մակարոնեղենի արտադրությունն իրականացվում է բոլոր քրեակատարողական հիմնարկներում, ինչը բավարարում է ՀՀ ԱՆ քրեակատարողական վարչության հետ երկկողմ պայմանագրերով նախատեսված սննդամթերքի քանակի պահանջարկը:
Հիմնադրամը զբաղվում է նաեւ գյուղատնտեսությամբ, մասնավորապես՝ հացահատիկային կուլտուրաների աճեցմամբ, այգեգործությամբ, անասնապահությամբ եւ մեղվաբուծությամբ: Այս բնագավառներում նույնպես դատապարտյալների ընդգրկվածությունն ապահովվում է:
Շատ դատապարտյալներ տիրապետում են արհեստների. նրանք ներգրավվում են թեթեւ արդյունաբերական ճյուղերում, ինչպիսիք են՝ կարուձեւի, կոշիկի, փայտամշակման, կահույքի արտադրությունները:
Հիմնադրամի առանձնակի ուշադրության կենտրոնում են նաեւ կին եւ անչափահաս դատապարտյալները, որոնք զբաղվում են գորգագործությամբ, անասնապահական եւ այգեգործական աշխատանքներով:
«Աջակցություն դատապարտյալին» հիմնադրամն ունի խանութ-տաղավար, որտեղ վաճառվում են դատապարտյալների կողմից պատրաստված ստեղծագործական աշխատանքները: Վաճառքից առաջացած գումարներն ուղարկվում են համապատասխան քրեակատարողական հիմնարկ` տվյալ դատապարտյալի հաշվեհամարին կամ փոխանցվում նրա ընտանիքի անդամներին:
Հաճախ կազմակերպվում են նաեւ սպորտային, երաժշտական եւ մշակութային միջոցառումներ:
Դատապարտյալների կողմից նոր մասնագիտություն ձեռք բերելու ցանկության դեպքում հիմնադրամն աջակցում է` համապատասխան ուսումնական հաստատություններին գումարներ տրամադրելով:
Կնքվում են նաեւ պայմանագրեր, ինչի արդյունքում երկամսյա կամ եռամսյա մասնագիտական կուրսեր են անցկացվում դատապարտյալների հետ՝ նրանց տրամադրելով պետական նմուշի վկայական:
Այս հանգամանքը նպաստում է, որպեսզի ազատված դատապարտյալները հետագայում խուսափեն դժվարություններից եւ ավելի հեշտ ինտեգրվեն քաղաքացիական կյանքին:
«Առավոտ» օրաթերթ
24.10.2014
