Ազատամարտիկ Գագիկ Սարուխանյանը վստահ է՝ եռյակի հաջողությունները ժողովրդի հաջողությունները չեն դառնալու:
«Եթե նույնիսկ նման գործողությունների գնան ու հասնեն հաջողությունների, դա կլինի Գագիկ Ծառուկյանի, ԲՀԿ-ի, եռյակի հաջողությունը, բայց ոչ երբեք ժողովրդի հաջողությունը: Որովհետեւ այսօրվա իշխանությունները, որ ժողովրդին հասցրել են այս չքավոր վիճակին, այդ եռյակ կոչեցյալը անմասն չի եղել: Բոլորս գիտենք՝ ԲՀԿ-ն Ռոբերտ Քոչարյանի կուսակցությունն է, բոլորս գիտենք՝ Լեւոն Տեր-Պետրոսյանի արածները, եռյակ ասածը դիտարկում եմ կուսակցությունների առաջնորդներով: Եթե հիմա ներսում ինչ-որ խմորումներ են գնում, ժողովրդին դրանից ոչ մի օգուտ: Զարմանում եմ՝ միամիտ մարդիկ ոգեւորվում են ու միանում, բայց ինչի՞ն են միանում, ի՞նչ կարգախոսի»,- Aravot.am-ին ասաց պարոն Սարուխանյանը:
Նա եռյակի գործունեությունը, այսօրվա հանրահավաքի ժամանակ հնչեցրած ելույթներն ու հայտարարությունները համարում է իշխանության գրած սցենարով բեմադրություն.«Լուրջ քաղաքական նպատակներ եռյակի կողմից չեմ տեսնում»:
Հիշեցնենք, որ այսօր մի խումբ ազատամարտիկներ պատրաստակամություն են հայտնել եռյակի հանրահավաքից հետո նստացույց սկսել Ազատության հրապարակում, ինչը կանխեց ԲՀԿ առաջնորդը: Այս կապակցությամբ պարոն Սարուխանյանն ասաց, որ տեղյակ չէ՝ ազատամարտիկների ինչ խումբ է նստացույցի մասին հայտնել.«Բնական է, որ չէին թողնի նստացույց: Տեսել ենք էլի, Լեւոնի դրոշի տակ «Մարտի 1» արեցին, անունը դրեցին տնային կալանքի մեջ է, ամեն ինչ մարեց: Մի անգամ ժողովրդին տարել, փուռը տվել է, հիմա երկրորդ անգա՞մ են տանում, նորից նույն քա՞յլն են անում»:
Կարդացեք նաև
ԲՀԿ առաջնորդի հայտարարությանը, թե «մայդանի կոչ չեն անում, բայց դրա այլընտրանքը չպետք է լինի լճացումը», ազատամարտիկը ի պատասխան հարցրեց՝ բա ինչի կոչ են անում. «Այդ փոփոխությունների համար դուրս եկող այդ նույն Ծառուկյանը համապետական ընտրությունների ժամանակ իշխանությունների հետ քվոտավորված փող էր բաժանում: Ինչո՞ւ էր ժողովրդին իշխանությունների հետ հասցնում այդ վիճակին, ստրկությանը սովորեցնելուն: Հիմա Ծառուկյանն ասե՞լ է, որ ներողություն է խնդրում ընտրակաշառք բաժանելու համար: Միայն ասում է՝ այլընտրանք ենք, այսինքն` ժողովուրդ ջան դու որոշի ընտրակաշառքը ինձանի՞ց, թե՞ ՀՀԿ-ից կվերցնես: Արմատական փոփոխություն չի առաջարկում, մենակ ասում է՝ երկրի վիճակը վատ է, հա բոլորն էլ գիտեն՝ վատ է: Բայց ի՞նչն է փոխելու, չի ասում: Ես կոնկրետ տվյալներ ունեմ, որ մարդիկ ԲՀԿ-ականներին պատկանող փուռում են աշխատում, իրեն կոնկրետ ասել են՝ վաղը չորս հոգու կտանես հանրահավաքի… էդ մասսան հեղափոխական մասսա՞ է »:
Արփինե ՍԻՄՈՆՅԱՆ
Կլասիկ կարուսել է: Ժողովրդի տեղը լինեմ, բոլորից էլ կխռովեմ, որ սկսեն վախենալ: Թե չէ էստեղ էնտեղ են անում, պայքարի գաղափարը վարկաբեկում: