«Մի՛ սպասեք, որ երկրորդ հանրահավաքի ընթացքում ինչ-որ լուրջ բան կլինի»,- այսօր՝ հոկտեմբերի 24-ին, «Փաստարկ» մամլո ակումբում լրագրողների հետ հանդիպման ընթացքում, անդրադառնալով ԱԺ ոչ իշխանական եռյակի երկրորդ հանրահավաքին, հայտարարեց հրապարակախոս Գուրգեն Եղիազարյանը:
Նա համարում է, որ այսօր դժվար թե իշխանափոխություն կլինի, քանի որ ըստ նրա՝ իշխանություններն այնքան չարիքներ են գործել, որ մեկ ժամվա ընթացքում չեն լքի Հայաստանը:
Գուրգեն Եղիազարյանը նշեց, որ եռյակի առջեւ կանգնած է մի ամբողջ բանակ, անվտանգության համակարգ եւ ոստիկանություն: Եվ ըստ նրա կանխատեսման՝ եռյակը շուտով կդառնա երկյակ. «Բնական է՝ պետք է աշխատեն քանդել, տրոհել, բաժանել, որպեսզի հանկարծ չիրագործվի իշխանափոխությունը: Եվ այդ մասնակիցների 90 տոկոսը կապ չունի այն բարիքների հետ, որոնք մի քանի տոկոսով օրուգիշեր ուտում են»:
Անդրադառնալով «Օրինաց երկիր» կուսակցությանը՝ պարոն Եղիազարյանը նշեց, որ ընդդիմություն լինելը նշանակում է ոչ մի բան չունենալ, հետապնդվել. «Հիմա ինձ ասում եք՝ Արթուր Բաղդասարյանը ընդդիմություն է: Այո՛, տեսանք մարտեր հողի կտորի համար, բայց դա այգու տարածքն է, դա հանրային օգտագործման տարածքն է: Խելքի եկե՛ք, տեսե՛ք ի՞նչ եք անում ընդհանրապես: Դուք տեսե՞լ եք ընդդիմություն, որ մի հողակտորի համար մարտեր վարի իշխանությունների հետ»:
Կարդացեք նաև
Նրա կարծիքով՝ ավելի ճիշտ կլինի, որ ԱԺ ոչ իշխանական եռյակ ոչ մի կուսակցություն չմտնի: Եթե եռյակի կազմի մեջ մտնեն այդպիսի ընդդիմադիրներ, ապա ըստ նրա՝ ամբողջ դաշտը իր գույնը կփոխի՝ կդառնա գորշ:
Ամի ՉԻՉԱԿՅԱՆ
