«Մանկական քաղցկեղի բուժման համար հայաստանյան հիվանդանոցները դեռ հեռու են միջազգային չափանիշներից: Եթե չունենք կրթված մասնագետներ, ինչքան էլ հիվանդանոցները տեխնիկայով զինենք, զինանոցն անպիտան կլինի առանց որակյալ մասնագետների: Այս միջոցառումը նվիրված է մասնագետներին դարձնել առաջնակարգ, որը ինչպես մնացած բնագավառներում, այս ոլորտում եւս բարելավումների կարիք կա»,-այսօր` Մանկական բժիշկների 4-րդ ազգային կոնֆերանսի ժամանակ, որն անց էր կացվում «Արմենիա Մարիոթ» հյուրանոցում, Aravot.am-ի հետ զրույցում ասաց «Մանկական բժիշկների հայկական ասոցիացիայի» փոխնախագահ Սերգեյ Սարգսյանը:
Նա ասաց, որ 2 տարին մեկ ասոցիացիան կազմակերպում է նման գիտաժողով, որի հիմնական նպատակը սոցիալական, կրթական է: Այս 2 օրերի ընթացքում մանկաբույժները, ընտանեկան բժիշկները կլսեն դասախոսություններ մանկական տարիքում ինֆեկցիաների, մանկական սակավարյունության, նյարդաբանական հիվանդությունների, սնուցման խանգարումների վերաբերյալ, որոնք ներկայացնելու են առաջատար մասնագետներ՝ Հայաստանից, 9 պրոֆեսոր ՌԴ-ից, Շվեյցարիայից, Վրաստանից, Դանիայից: Գիտաժողովին մասնակցում է շուրջ 350 բժիշկ:
Պարոն Սարգսյանը նշեց, որ չնայած մանկական մահացությունների թիվը իջել է, բայց ինչպես բոլոր երկրներում `Հայաստանում եւս կան խնդիրներ. «Դեռ չլուծված խնդիրներ ունենք նորածնային հասակի երեխաների կառավարման, վաղ հասակում երեխայի սնուցման հարցերի կարգավորման, սակավարյունության վերաբերյալ, քանի որ հայ երեխաների շուրջ 30 %-ի մոտ նկատվում է սակավարյունության նշաններ»:
Մեր զրուցակցի ներկայացմամբ, կարեւոր խնդիրներից են նաեւ երեխաների զարգացման խանգարումները. «Եթե նախկինում մի շարք հիվանդությունների պատճառով երեխան մահանում էր, ապա հիմա փրկում են մահից, բայց զարգացման խնդիրները, միեւնույն է, կան»:
Կարդացեք նաև
Գիտաժողովի մի հատված նվիրվելու է Հայաստանում կատարված գիտական աշխատանքների ներկայացմանը, իսկ բոլոր մասնակիցները կստանան ՀՀ առողջապահության նախարարության կողմից վավերացված վկայագրեր:
Անուշ ՄԱԹԵՎՈՍՅԱՆ
