Գյուղացու բերքը չի ցրտահարվի, քանի որ այն մարզերում որտեղ հոկտեմբերի 27-ից սպասվում է ջերմաստիճանի կտրուկ նվազում, գյուղացիները բերքն արդեն հավաքել են: Այսօր այս մասին «Հայացք» ակումբում ասաց ԱԻՆ Հիդրոմետ ծառայության օդերեւութաբանական կանխատեսումների բաժնի պետ Գագիկ Սուրենյանը:
Ջերմաստիճանը կնվազի մասնավորապես՝ Տավուշում, Լոռիում, հոկտեմբերի 26-27-ին օդի ջերմաստիճանը կնվազի 17-20 աստիճանով:
Գագիկ Սուրենյանի ներկայացմամբ, ջերմաստիճանի կտրուկ նվազումը պայմանավորված է Արեւմտյան Սիբիրից դեպի մեր հանրապետություն տեղաշարժվող արկտիկական հոսանքներով:
«Այդ օրերին կլինի ձյուն, մերկասառույց: Հանրապետության որոշ շրջաններում այդ տատանումը կլինի 7-10 աստիճան»,-նշեց Գագիկ Սուրենյանը:
Կարդացեք նաև
Ըստ նրա, հոկտեմբերի 28-ից այդ հոսանքները կթափանցեն դեպի հյուսիս եւ կլինի ջերմաստիճանի բարձրացում:
Գագիկ Սուրենյանի խոսքերով՝ նոյեմբեր ամիսը կլինի այնպես, ինչպես եղել է տարիներ շարունակ. «Նոյեմբերի առաջին տասնօրյակում օդի ջերմաստիճանը կլինի մինչեւ 15 աստիճան, իսկ երկրորդ տասնօրյակում ջերմաստիճանը կնվազի, հասնելով մինչև 2 աստիճան ցրտի: Կլինեն փոփոխություններ, բայց նորմայից շեղումներ չենք ունենա»:
Լուսինե ԲՈՒԴԱՂՅԱՆ
