Հոկտեմբերի 25-31-ը անիմացիոն ֆիլմերի շաբաթ է. մեկնարկում է «ՌեԱնիմանիա» Երևանի 6-րդ միջազգային անիմացիոն կինոփառատոնը:
Փառատոնն այս տարի կհյուրընկալի համաշխարհային անիմացիայի առաջատար երկրներից ժամանող շուրջ 20 ճանաչված հյուրերի (Մարկ Շապիրոն, Գարի Շվարց, Կարոլին Շվայցեր, Շառլի Սանսոնետտի, Արմինե Սանսոնետտի և ուրիշներ):
Այս տարի «ՌեԱնիմանիա» Երևանի միջազգային անիմացիոն կինոփառատոնն ստացել է 900 հայտ՝ շուրջ 90 երկրից, որոնցից կցուցադրվեն 400 լիամետրաժ և կարճամետրաժ անիմացիոն ֆիլմեր ու հոլովակներ:
«Դեռևս 2009 թ. հիմնադրված այս կինոփառատոնը տարիների ընթացքում բավականին լուրջ դերակատարություն է ունեցել մեր անիմացիոն ֆիլմարտադրության մեջ»,- այսօր լրագրողների հետ հանդիպման ժամանակ ասաց ՀՀ մշակույթի նախարարի տեղակալ Արթուր Պողոսյանը՝ հիշելով, որ առաջին անգամ, երբ այս փառատոնը ներկայացվել է Մշակույթի նախարարությանը քննարկման համար, իրեն միանգամից հետաքրքրել է դրա անվանումը. «Երբ կազմակերպիչներին հարցրի՝ ինչու «ՌեԱնիմանիա», նրանք մեկ նախադասությամբ բացատրեցին փառատոնի հիմքում դրված գաղափարախոսությունը՝ վերականգնել անիմացիոն ֆիլմարտադրության լավագույն ավանդույթները և համաշխարհային ասպարեզում պարզել մեր մշակույթի տեղն ու դերը»,- պատմեց մշակույթի փոխնախարարը և ուրախությամբ նկատեց, որ փառատոնն արդեն իր ուրույն տեղն ունի և դարձել է տարածաշրջանային նշանակության փառատոն. «Այն իր տեսակով միակն է տարածաշրջանում և շատ արագ կարողացավ ընդգրկվել միջազգային ցանցի մեջ»,- հավելեց նա:
Կարդացեք նաև
Պարոն Պողոսյանը տեղեկացրեց նաև, որ փառատոնն իր մեծ հեղինակության շնորհիվ այս տարի արժանացել է Կառավարության հատուկ վերաբերմունքին, և վարչապետը հրահանգել է ևս հինգ միլիոն դրամ հատկացնել փառատոնին:
Երևանի միջազգային անիմացիոն կինոփառատոնի հիմնադիր տնօրեն Վրեժ Քասունին էլ ասաց, որ այս տարվա փառատոնն իր համար առանձնանում է հատկապես երկու կարևոր կետերով. «Նախ՝ այն, ինչ խոստացել էինք տարիներ առաջ, այսօր արդեն իրականացրել ենք: Այսինքն՝ սկզբում թերահավատություն կար, մարդիկ մտածում էին, թե միայն ցուցադրություններ կլինեն ու վերջ, բայց ժամանակը ցույց տվեց, որ սա միայն ցուցադրություն չէ, այլև նոր սերնդի մասնագետների պատրաստում: Ասածիս վառ ապացույցը մեր երիտասարդ մասնագետներից մեկի՝ Լևոն Պետրոսյանի՝ Անգլիայում վերապատրաստման կուրս անցնելն էր: Լևոնը հիմա ստուդիա ունի Էջմիածնում, որի սաներից մեկն ամեն տարի մեկնում է վերապատրաստման:
Երկրորդ կարևոր կետն ինձ համար դեռևս արտադրության մեջ գտնվող անիմացիոն կինոնախագծերն են, որոնք նվիրված են Հայոց ցեղասպանությանը (Սերժ Ավեդիքյանի «Վերջին ռաունդը Ստամբուլում» և Իլյա Յուդովիչի ու Վալենտին Լապինի՝ Վիլյամ Սարոյանի «Գեղեցիկ սպիտակ ձիու ամառը» վիպակի հիման վրա նկարահանվող «Իմ սիրտը» ֆիլմերը)»,- ասաց Վ. Քասունին՝ հավելելով, որ եթե հաջողվի այդ կինոնախագծերն ավարտին հասցնել, ապա դրանք կցուցադրվեն արդեն 7-րդ «ՌեԱնիմանիայի» շրջանակներում:
Կինոփառատոնի գեղարվեստական ղեկավար Րաֆֆի Մովսիսյանն էլ անդրադարձավ փառատոնին ներկայացված պրեմիերաներին, որոնք այս տարի վեցն են և, Ր. Մովսիսյանի խոսքով, աշխարհի լավագույն անիմացիոն ֆիլմերից են. «Մարդիկ համաձայնեցին այդ ֆիլմերը տալ, որովհետև հասկացան, որ սա լուրջ փառատոն է»,- ասաց «ՌեԱնիմանիայի» գեղարվեստական ղեկավարը:
Սիրանուշ ՀԱՅՐԱՊԵՏՅԱՆ
