«Դաշնակցությունը գաղափարի վրա հիմնված կուսակցություն է, մնացածը` ԲՀԿ-ն, ՀԱԿ-ն ու «Ժառանգությունը»` առանց ծանոթանալու, կարդալու, շուտասելուկի նման կրկնում են, թե իշխանության վերարտադրման համար է արվում այս ամենը»,-այսօր «Իրատես դե ֆակտո» մամուլի ակումբում լրագրողների հետ հանդիպմանը հայտարարեց ԱԺ ՀՀԿ խմբակցության պատգամավոր Արտակ Դավթյանը:
Ըստ նրա` ոչ իշխանական ուժերը խոսում են առանց հիմնավորման` չնշելով, թե ինչին են դեմ. «Այս հայեցակարգում առավել կարևոր հարցեր կան, քան խորհրդարանական կառավարման համակարգին անցնելը»:
Aravot.am-ի հարցին` մտահոգություն չունե՞ն, որ քաղաքական ուժերը կշարունակեն չմասնակցել այս հարցով քննարկումներին և քաղաքական փոխհամաձայնություն չի լինի, ինչը կարևորել էր Վենետիկի հանձնաժողովը, պարոն Դավթյանն այսպես պատասխանեց. «Ժամանակ կանցնի, կտեսնենք, թե քննարկումն ինչ հարցերի շուրջ կլինի: Երբ խոսում ենք սոցիալական ուղղվածության մասին, ապա դրա մասին խոսելով չեմ կարծում, որ որևէ մի կետով իշխանությունների վերարտադրության թեման պիտի առաջ մղվի, այս ամենը ի՞նչ կապ ունի ընդհանրապես կառավարման համակարգի հետ»:
Կապված քաղաքական ուժերի` քննարկումներին չմասնակցելուն, պարոն Դավթյանն ասաց. «Մի մասնակցեք, բայց ո՞ր մասով չմասնակցեք, իրավունքի գերակայությա՞ն, դատակա՞ն համակարգի փոփոխությունների, թե՞ մարդու իրավունքների և ազատությունների»:
Կարդացեք նաև
ՀՀ քաղաքացիների դիրքորոշման վերաբերյալ պարոն Դավթյանն ասաց, թե պարտավոր են հանրությանը ներկայացնել կարևոր կետերը և պարզաբանել դրանք: Այնուհետև պարզ կլինի, թե ինչ դիրքորոշում կգրանցվի:
Տաթև ՀԱՐՈՒԹՅՈՒՆՅԱՆ
